سەرچاوەیەكی پەیوەندیدار بە پڕۆژەیاسای سەربازیی زۆرەملێ بۆ ئێستا ئاشكرایكرد، ئەركەكە هەرێمی كوردستان دەگرێتەوە و مووچەی سەربازێكی عێراقی لە 700 هەزار دینار كەمترنابێت.
مەهدی تەقی ئامرلی، ئەندامی لیژنەی ئاسایش و بەرگریی ئەنجومەنی نوێنەران لە لێدوانێكدا بۆ تۆڕی میدیایی ئێستا لەبارەی پڕۆژەیای سەربازیی زۆرەملێ-وە دوا و ڕایگەیاند، ئێستا پڕۆژەیاساكە لەلایەن ئەنجومەنی وەزیرانەوە پەسەندكراوە و دەدرێت بە لیژنەكەی ئەوان كە لیژنەی ئاسایش و بەرگرییە، ئەوانیش دەیدەن بە ئەنجومەنی نوێنەران بۆ ئەوەی دەنگی لەسەر بدرێت.
لەبارەی تەمەنی بەسەربازكردنی هاوڵاتییانەوە، ئامرلی وتی، لە تەمەنی 18 بۆ 35 ساڵ دەگرێتەوە و گشت پارێزگاكانی عێراق بە هەرێمی كوردستانیشەوە دەگرێتەوە.
ئەو ئەندامەی لیژنەی ئاسایش و بەرگریی ئەنجومەنی نوێنەران پێشبینیكرد پەسەندكردنی پڕۆژەیاساكە یەك بۆ دوو دانیشتنی ئەنجومەنی نوێنەرانی پێویستبێت و پەسەندبكرێت.
وتیشی، مووچەی سەربازێك لە كاتی ڕاپەڕاندنی ئەركی سەربازیدا لە 700 هەزار دینار كەمترنابێت.
