سوهەیلە سوڵتانی ئەندامی لیژنەی نەوت و وزەی ئەنجومەنی نوێنەران دەڵێت، هۆكارەكانی پشت خراپیی دۆخی كارەبای عێراق و باشنەبوونی ئەو كەرتە گەندەڵی و ڕێگرییەكانی ئەمریكان.
بەپێی وتەی سوڵتانی، یەكێك لە هۆكارە سەرەكییەكانی كەمیی كارەبا ئەمریكایە كە نایەوێت عێراق ببوژێتەوە و گەشەبكات و ڕێگەنادات كۆمپانیا گەورەكانی جیهان بێنە عێراق و كەرتی كارەبا چاكبكەن.
هۆكارێكی تر وەك پەرلەمانتارەكە ڕایگەیاند، “گەندەڵیی حكومەتە یەك لە دوای یەكەكانی عێراقە كە لە ماوەی 17 ساڵی ڕابردوودا وەزیرە گەندەڵەكان ملیاران دۆلاریان خەرجكردووە و ئەو پارەیە بەشی دروستكردنی دەیان وێستگەی كارەبای دەكرد، كەچی كەرتی كارەبا باشنەكراوە و پارەكان چوونەتە گیرفانی گەندەڵكارانەوە”.
ئەندامەكەی لیژنەی نەوت و وزەی ئەنجومەنی نوێنەران دەڵێت، كۆمپانیای سیمنزی ئەڵمانی لە ماوەی سێ ساڵدا كەرتی كارەبای میسری چاككرد و ئێستا ئەو وڵاتە كە ژمارەی دانیشتووانەكەی 100 ملیۆن كەسن گرفتی كەمیی كارەبای نەماوە، كەچی عێراق بە 40 ملیۆن دانیشتووان و وزەیەكی زۆری نەوتەوە هاوڵاتییەكانی بەدەست قەیرانی كارەباوە دەناڵێنن.
