ژنە مامۆستایەكی پسپۆڕی كیمیا كە تەمەنی 50 ساڵە و ماوەی 18 ساڵە وانە دەڵێتەوە، لە كاتی دەرۆزكەریدا دەستگیركرا.
ڕووداوەكە لە كوەیت ڕوویداوە و میدیای ئەو وڵاتە ئاشكرایكردووە كە مامۆستاكە خەڵكی وڵاتێكی عەرەبییە و ماوەی 18 ساڵە لە كوەیت وانە دەڵێتەوە و هاوسەرەكەشی مامۆستای وانەی پەروەردەی ئیسلامییە، دوو منداڵیشیان لە خوێندنگەیەكی حكومیی كوەیت خوێندكارن.
بەپێی وتەی پۆلیسی كوەیت، ژنێكیان لە نزیك مزگەوتێك بینیوە ڕووخساری داپۆشیوە و دەرۆزكەریی كردووە، دوای دەستگیركردنی و لێكۆڵینەوەكردن، دەركەوتووە 18 ساڵە لە وەزارەتی پەروەردەی ئەو وڵاتە دامەزراوە و مامۆستایە.
پۆلیسی كوەیت دەڵێت، هەوڵ و فشار هەبوون بۆ ئازادكردنی ژنەكە، بەڵام مكوڕبوون لەسەر زیندانیكردنی بۆ ماوەی چەند ڕۆژێك و دواتر نێردراوەتەوە بۆ وڵاتەكەی خۆی، هاوسەرەكەشی ئاگاداركراوەتەوە دوای تەواوبوونی تاقیكردنەوەكانی كۆتایی ساڵ، خۆی و منداڵەكانی كوەیت بەجێبهێڵن.
ئاماژە بۆ ئەوەش دەكات كە دوای لێكۆڵینەوەكردن، دەركەوتووە ئەو خێزانە خاوەنی خانوبەرەی زۆرن لە وڵاتی خۆیان و باری ئابورییان باشە، بەبێ ئەوەی ناوی وڵاتەكەیان ئاشكرابكات.
