بافڵ جەلال تاڵەبانی ڕایدەگەیەنێت، خەونی هاوبەش و لەمێژینەی هەردوو هاوڕێ و هاوخەبات سەرۆك مام جەلال و كاك نەوشیروان دەستەبەركردنی ژیانێكی شەرەفمەندانە و حوكمڕانییەكی تەندروست بوو، بەرپرسیارێتیی ئێمەیە بەشوێنپێی ئەواندا بەردەوامبین.
بافڵ جەلال تاڵەبانی پەیامێكی بەبۆنەی ساڵیادی كۆچی دوایی نەوشیروان مستەفا ئەمین بڵاوكردەوە و ڕایگەیاند، ئەمڕۆ بە خەمێکی قووڵەوە یادی کۆچی دوایی سەرکردەیەکی مەزنی شۆڕشی نوێی گەلەکەمان، سیاسییەکی بەئەزموون، نووسەر و ڕۆژنامەنووسێکی گەورەی کوردستان دەکەینەوە.
دەشڵێت، “ژیان و خەباتی کاک نەوشیروان مستەفا لەپێناو سەربەرزی و سەرفرازیی خەڵکی کوردستان بۆ هەمیشە لە یادەوەریماندا بە زیندوویی دەمێنێتەوە و سەری ڕێز بۆ ئەو مێژووە پڕ دەسكەوت و درەوشاوەیە دادەنەوێنین”.
بافڵ جەلال تاڵەبانی دووپاتیشیدەكاتەوە، خەونی هاوبەش و لەمێژینەی هەردوو هاوڕێ و هاوخەبات سەرۆك مام جەلال و كاك نەوشیروان، دەستەبەركردنی ژیانێكی شەرەفمەندانە و حوكمڕانییەكی تەندروست بوو بۆ خەڵكی كوردستان. بۆیە ئەرك و بەرپرسیارێتی ئێمەیە بەشوێنپێی ئەواندا لە هەوڵ و تێكۆشان بەردەوامبین بۆ بونیادنانی داهاتوویەكی سەقامگیر و خزمەتكردنی هاوڵاتییان.
