پارێزگای هەولێر، ئاماری ڕووداوەكانی ڕۆژانی جەژنی ڕەمەزانی ئەمساڵی بڵاوكردەوە كە 38 تاوان لەماوەی سێ ڕۆژی جەژندا ئەنجامدراون، 10 ڕووداوی هاتوچۆ تۆماركراون كە بەهۆیەوە دووكەس گیانیان لەدەستداوە و 13 كەسی دیكە برینداربوون.
بەپێی ڕاگەیەندراوێكی نووسینگەی پارێزگاری هەولێر تێیدا هاتووە، بەپێی ئەو ئامادەكاری و پلانانەی بۆ سێ ڕۆژی جەژنی ڕەمەزان ئامادەكرابوون، بەسەركەوتوویی جێبەجێكران.
ئاماری گشتیی ڕووداوەكان لە ڕۆژانی جەژنی ڕەمەزان لەسنووری هەولێر:
یەكەم/ پۆلیس:-
سەبارەت بە پلانی ئەمنی و ئامادەباشيی بەڕێوەبەرایەتیی پۆلیسی هەولێر، بەبەشداریی سەرجەم هێزەكان لەهەموو بەش و هۆبەكانی بەڕێوەبەرایەتی لەهەرسێ ڕۆژی جەژنی ڕەمەزان، وەك چۆن داڕێژرابوو تەواوی بڕگەكانی وەكو خۆی و بەسەركەوتوویی جێبەجێكران، ئاماری تاوانەكانیش لەڕۆژانی جەژن بەمشێوەیە بوون، 38 تاوان تۆماركراون، 33 ئاشكراكراوە، 5 تاوانیش لە ژێرلێكۆڵینەوە دان.
دووەم/ هاتوچۆ:-
سەبارەت بەپلانی بەڕێوەبەرایەتیی هاتوچۆی هەولێر بۆ ڕۆژانی جەژنی ڕەمەزانی پیرۆز، وەك چۆن داڕێژرابوو تەواوی بڕگەكانی وەكو خۆی و بەسەركەوتوویی جێبەجێكران، بەڵام بەداخەوە بەهۆی پابەندنەبوونی شوفێران بەڕێنمایی و یاساكانی هاتوچۆ و لێخوڕینی خێرا، 10 ڕووداوی هاتوچۆ ڕوویاندا و لەئەنجامیاندا 13 كەس برینداربوون و 2 كەسیش گیانیان لەدەستدا.
سێیەم/ بەرگریی شارستانی:-
تەواوی بنكەكانی بەڕێوەبەرایەتیی بەرگریی شارستانی هەولێر بۆ ڕۆژانی جەژنی ڕەمەزانی پیرۆز لە ئەرك دابوون، لەو ماوەیەشدا 6 حاڵەتی ئاگركەوتنەوە هەبوون، سەرجەم حاڵەتی ئاگركەوتنەوەكانیش لەلایەن تیمەكانی بەرگریی شارستانییەوە كۆنترۆڵكراون و خۆشبەختانە جگە لە زیانی مادديی هیچ زیانێكی گیانیان لێنەكەوتووەتەوە.
چوارەم/ گەشتوگوزار:-
سەبارەت بەپلانی گەشتوگوزار، بۆ ڕۆژانی جەژنی ڕەمەزانی پیرۆز، وەك چۆن داڕێژرابوو تەواوی بڕگەكانی وەكو خۆی و بەسەركەوتوویی جێبەجێكران، ژمارەی ئەو گەشیارانەی تەنها لە ڕۆژانی پشووی جەژن سەردانی هەولێر پایتەختیان كردووە بریتی بوو لە 138.112 گەشتیار.
