جێگری سەرۆك وەزیرانی هەرێم دەڵێت، ئەنجومەنی وەزیران لە كۆبوونەوەی ئەمڕۆیدا پەیڕەوی ناوی بازرگانی و تۆمارنامەیان پەسەندكردووە و بەهۆیەوە لەمەودوا دامەزراندن و تۆماركردنی كۆمپانیا تەنها یەك ڕۆژ دەخایەنێت.
قوباد تاڵەبانی جێگری سەرۆك وەزیرانی هەرێمی كوردستان پەیامێكی بڵاوكردەوە و دەڵێت، “هەروەک لە ماوەی دوو ساڵی ڕابردوودا، بەڵێنمان دابوو لەپێناو بەهێزکردنی کەرتی تایبەت ئاسانکاری بکەین بۆ دامەزراندنی کۆمپانیا و ڕۆتین کەمبکەینەوە، بەخۆشحاڵییەوە ئەمڕۆ لە کۆبوونەوەی ئەنجومەنی وەزیران (پەیڕەوی ناوی بازرگانی و تۆمارنامەی بازرگانی)مان پەسندکرد، كە دە‌رئە‌نجامی كاری ھاوبە‌شی نێوان؛ نوسینگە‌ی بە‌ندە، نوسینگە‌ی سەرۆك وەزیران و وەزارەتی بازرگانی و پیشە‌سازی بوو”.
قوباد تاڵەبانی دەشڵێت، “ئەگەر پێشتر دامەزراندنی کۆمپانیایەک و تۆمارکردنی ناوەکەی چەند مانگی دەخایاند، لەمەودوا تەنها یەك ڕۆژ دەخایەنێت و بە‌تێچوویە‌كی كە‌میش”.
باوەڕی خۆیشی نیشاندەدات بەوەی ئەو هەنگاوە یارمەتیدەر دەبێت لە پێشخستنی کەرتی تایبەت و دروستکردنی هەلی کاری زیاتر.
ئەمڕۆ ئەنجومەنی وەزیرانی هەرێمی كوردستان كۆبوونەوەی ئاسایی هەفتانەی خۆی ئەنجامدا، لە بڕگەی سێیەمی كۆبوونەوەكەدا ڕەشنووسی (پەیڕەوی ناوی بازرگانی و تۆمارنامەی بازرگانی لە هەرێمی کوردستان) پەسەندکرد و ئاشكرایكرد، ئامانج لێی ڕێکخستنەوەی ڕێکارەکانی بەدەستهێنانی ناوی بازرگانی و تۆمارکردنی لە تۆمارنامەی بازرگانی و دەستنیشانکردنی لایەنی پەیوەندیدارە کە وەزارەتی بازرگانی و پیشەسازیی حکومەتی هەرێمە، ئەویش بە ئاراستەی ئاسانکاریی بۆ بازرگان و خاوەنکاران و سوودوەرگرتن لە تەکنەلۆجیای زانیاری و پێدانی ژمارەی بێهاوتا بە بازرگانان بە ئاڕاستەی ئاسانکاریی لە ڕاییکردنی مامەڵەکان و کەمکردنەوەی ڕۆتین و برەودان بە چالاکیی بازرگانی.
