قوباد تاڵەبانی جێگری سەرۆک وەزیرانی هەرێمی کوردستان لەگەڵ بەرپرسانی باڵای یۆنان سەبارەت بە پرسی کۆچبەران کۆبووەوە، جێگری سەرۆکی حکومەت داوایکرد وڵاتانی ئەوروپا لەجیاتی دابینکردنی بودجە بۆ تۆکمەکردنی سنوورەکان هانی وەبەرهێنان لە هەرێمی کوردستان بدەن.
قوباد تاڵەبانی لەگەڵ نۆتیس میتراکی وەزیری کۆچ و پەنابەرانی یۆنان و فابریس لیگێری سەرۆکی ئاژانسی فرۆنتێکسی یۆنان لە یەکێتیی ئەوروپا بۆ سنوور و پاسەوانیی دەریایی کۆبووەوە، نیگەرانیی خۆی سەبارەت بە دۆخی کۆچبەرانی کورد لەو وڵاتە و وڵاتانی یەکێتیی ئەوروپا دەربڕی.
داوایکرد، بەشێوەیەکی مرۆڤدۆستانە مامەڵە لەگەڵ کۆچبەراندا بکرێت.
جێگری سەرۆکی حکومەت وەک چارەسەر بۆ کێشەی کۆچ، هاندانی کۆمپانیا وەبەرهێنەرەکان بۆ وەبەرهێنان و رەخساندنی هەلی کار لە هەرێمی کوردستان بە چارەسەر دانا، ئەوەش لەڕێگەی کاری هاوبەشی ئابورییەوە، ئەوە جگە لە چارەسەری کێسەی کۆچ دەکات لەڕووی ئابوریشەوە لەبەرژەوەندیی وڵاتانی ئەوروپایە.
قوباد تاڵەبانی داوای لە بەرپرسانی یۆنانی و یەکێتیی ئەوروپا کرد کە ئاسانکاریی زیاتر بکرێت لە پێدانی ڤیزە بە هاوڵاتییانی کوردستان و پرۆسەی گەشتکردنی یاسایی ئاسانتر بکرێت بۆ ئەوەی هاوڵاتییان چیتر بیر لە ڕێگەی قاچاخ بۆ کۆچکردن نەکەنەوە.
هەردوولا جەختیان لە کاری هاوبەشکردەوە بۆ بەرەنگاربوونەوەی تۆڕەکانی قاچاخچێتی بە مرۆڤەوە کە بوونەتە هۆی رووتاندنەوە و تەنانەت کوشتنی کۆچبەران لەسەر سنوورەکان.
