لە سلێمانی لە مانگی ڕەمەزاندا نرخەکان بەجێگری دەمێننەوە و ڕێگە بە گرانبوونی خۆراک نادرێت.
قائیمقامییەتی سلێمانی، لە ڕاگەیەندراوێكدا ئاماژەی بەوەكردووە، لە کۆبونەوەیەکدا لەگەڵ نوێنەری فەرمانگە پەیوەندیدارەکان، ئاوات محەمەد، قائیمقامی سلێمانی ڕایگەیاند، “ڕێگە نادەین هیچ کەس و لایەنێکیش بەهۆی زۆربوونی خواستەکانەوە نرخی خۆراک بەرز بکاتەوە”.
لەبارەی ڕێکارەکانیشەوە بڕیاریدا چاودێری و بەدواداچونەکانی تەواوی لیژنەکان زیاتر بکرێن و لیژنەیەکی تایبەتیش بە مانگی ڕەمەزان بۆ جێبەجێکردنی ڕێنماییەکان دروستبکرێت.
قائیمقامی سلێمانی تەئکیدیشیکردەوە کە بڕێکی زۆر خۆراک و پێداویستی لە بازاڕو کۆگاکاندا هەیە و لەگەڵ ئەوەشدا بە وردی چاودێری کوالێتی و نرخەکان دەکەن و ڕێکاری توندیش لەگەڵ ئەو کەسانە دەگرنەبەر کە نرخی خۆراک لە مانگی ڕەمەزاندا بەرزدەکەنەوە.
هەر لە کۆبونەوەکەدا بڕیاردرا هەر چێشتخانەیەک دەیەوێت کار بکات ڕێگەی پێدەدرێت بەمەرجێک، ڕێز لە مانگی ڕەمەزان و ڕۆژووانان بگرێت و لە ڕۆژانی جەژنیشدا چێشتخانەکە کراوە بێت. تەواوی شوێنەکانی مەیفرۆشتن دادەخرێن و رێگە بە کردنەوەیان نادرێت.
