کۆشکی سپیی ئەمریكا بڵاویكرده‌وه، بەڵگەیان لەبه‌رده‌ستدایه لەبارەی ئەوەی، سەرۆکی ڕوسیا زانیاریی ھەڵەی سەبارەت بە شەڕی ئۆكرانیا پێدراوە، ئەوەش بووه‌ته هۆی دروستبوونی گرژی لە نێوان پوتین و بەرپرسە سەربازییەکانی ڕوسیا.
کەیت بەدینگفیڵد، بەڕێوەبەری پەیوەندییەکانی کۆشکی سپی، لە کۆنگرەیەكی ڕۆژنامەوانیدا لە کۆشکەكەوە ڕایگەیاند، “بەڵگەمان لەبه‌ردەستدایە لەبارەی ئەوەی کە پوتین ھەستی بەوە کردووە كە لەلایەن سوپای وڵاتەكەیەوە زانیاریی ھەڵەی پێدراوە”.
بەوتەی بەرپرسەكەی كۆشكی سپی، ئەوە ڕێگای بۆ دروستبوونی گرژی لەنێوان پوتین و بەرپرسە سەربازییەکان کردووەتەوە.
بەدینگفیڵد سروشتی ئەو زانیارییانەی ئاشكراكرد، كە بەوتەی خۆی، دراوە بە پوتین، ئەوانیش زانیارییە لەبارەی توانای سوپای ڕوسیا و هەروەها کاریگەریی خراپی سزا ئابورییەکان لەسەر وڵاتەكە.
