لیۆنێل مێسی سوپاسی هاندەرانی كرد كە هەمیشە خۆشەویستی زیاتری پیشان دەدەن و جەختیشی كردەوە كە پاش مۆندیال پێداچونەوە بۆ هەندێ بڕیار دەدات.
هەڵبژاردەی ئەرجەنتین بە سێ گۆڵی بێ بەرامبەر سەركەوتنی بەسەر هەڵبژاردەی فەنزوێلا بەدەستهێنا.
پاش یارییەكە مێسی كاپتنی ئەرجەنتین وتی: “هاندەرانی هێورنابنەوە و كەشێكی شێتانە دەدەن بە یارییەكانمان.”
وتیشی: “سوپاسیان دەكەم كە هەمیشە وامان لێدەكەن حەز بە یاریكردن بكەین لەبەردەمیاندا.”
مێسی جەختی كردەوە كە هەندێ شت هەیە پێویستی بە گۆڕانكارییە و دوای مۆندیال پێداچونەوە بۆ ژیانی خۆی دەكات.
لیۆنێل مێسی ڕابەرایەتی هەڵبژاردەی ئەرجەنتینی كردووە لە دوو ساڵ و شەش مانگی ڕابردوودا و لە 30 یاریدا 20 بردنەوە و 10 یەكسان بونیان تۆماركردووە.
