لە وەڵامی ئەو سزا ئابوری و کەلتوورییانەی لەلایەن خۆرئاواوە بەسەر وڵاتەکەدا سەپێندراون، وەزارەتی ڕۆشنبیریی ڕوسیا ڕایگەیاند، پێویستە فیلمە ڕوسییەکان زیاتر بەرەوپێش ببرێن.
ئالا مانیلۆڤا جێگری وەزیری ڕۆشنبیریی ڕوسیا لەبارەی سزا نێودەوڵەتییەکان و بارودۆخی کەلتووریی ڕوسیاوە ڕایگەیاند، “حکومەتی ڕوسیا لە گرنگییەکەی تێدەگات و ڕێوشوێنی گرتووەتەبەر بۆ پشتگیریکردنی بەرهەمهێنانی سینەمایی و تەرخانکردنی پارەی زیاتر بۆ پەرەپێدانی، ئامانجەکەش بەرهەمهێنانی فیلمی ڕوسیی وەهایە کە لە سینەماکان و تەلەڤیزیۆن و ئینتەرنێتیشدا جێگەی فیلمە خۆرئاواییەکان بگرنەوە”.
ئەمە لەکاتێکدایە کە Warner Bros، Sony، Paramount و چەندین کۆمپانیای دیکەی بەرهەمهێنانی خۆرئاوایی و چەندین ئەکادیمیا و دامەزراوەی فیلم لە وڵاتانی خۆرئاوا، بڕیاری نمایشنەکردنی فیلمەکانیان لە ڕوسیا و بایکۆتکردنی سینەمای ئەو وڵاتەیان داوە.
