دەسەڵاتی دادوەریی عێراق، سزای لەسێدارەدانی بەسەر كەسێكدا سەپاند كە ماڵی پووری خۆی تەقاندووەتەوە و كوڕەكەی كوشتووە.
بەپێی ڕاپۆرتی ئەنجومەنی باڵای دادوەری، ڕووداوەكە لە باشووری خۆرهەڵاتی بەغداد ڕوویداوە، گەنجێك هەوڵیداوە هاوسەرگیری لەگەڵ پورزایەكیدا بكات و چووەتە خوازبێنیی كچەكە، بەڵام پووری بەو هاوسەرگیرییە قایلنەبووە.
بەپێی ڕاپۆرتەكە، كوڕەكە چەند جارێك داوای كچەكەی لە پووری كردووە، بەڵام بەهۆی جیاوازیی ئاستی خوێندنیانەوە بەو پرۆسەیە قایلنەبوون، كچەكە خاوەنی بڕوانامەی ماستەرە و كوڕەكەش خوێندنی تەواونەكردووە.
سەرچاوەیەكی ڕۆژنامەوانی لە ئەنجومەنی باڵای دادوەری دەڵێت، تۆمەتبارەكە بۆمبێكی لە ماڵی پووریدا داناوە، دواتر و لەكاتێكدا پووری و كوڕ و كچەكەی لە ماڵەكەدا بوون، بۆمبەكەی لەڕێگەی تەلەفۆنەوە تەقاندووەتەوە و كوڕەكە كوژراوە.
دوای لێكۆڵینەوە، دادگا بۆیدەركەوتووە تۆمەتبارەكە پەیوەندی بە ڕێكخراوی داعشەوە هەبووە، بەپێی یاسای سزادانی عێراقی بڕیاری لەسێدارەدانی بەسەردا سەپێندراوە، وەك ئەنجومەنی باڵای دادوەری ئاشكرایكردووە.
