ڕاهێنەری ئیتاڵیی یانەی ڕیاڵ مەدرید، کارلۆ ئەنچیلۆتی ئەگەر لەم وەرزەدا ناسناوی لالیگا بباتەوە، ڕیکۆردێکی مێژوویی تۆماردەکات.
یانەی ڕیاڵ مەدرید لەم وەرزەی خوولی ئیسپانیا بە 63 خاڵ لەلوتکەدایە و هەشت خاڵ پێش ئیشبیلیە کەوتووە کە نزیکترین ڕکابەرە لێیەوە، لەکاتێکدا هەردوو تیپەکە 11 یاریان ماوە.
بەپێی زانیارییەکانی ڕۆژنامەی مارکای ئیسپانی، ئەگەر ڕیاڵ مەدرید لەم وەرزەدا (2021/2022) تاجی لالیگا لەسەربنێت، ئەنچیلۆتی دەبێتە یەکەمین ڕاهێنەر کە توانیویەتی ناسناوی پێنج خوولە گەورەکەی ئەوروپا بەدەستبهێنێت.
ڕاهێنەرە ئەزمووندارەکەی ئیتاڵیا لەپێشوودا ناسناوی کالچیۆی لەگەڵ ئەی سی میلان، پریمەرلیگ لەگەڵ چێڵسی، بۆندس لیگای لەگەڵ بایرن میونشن و تاجی خوولی فەرەنسای لەگەڵ پاریس سان جێرمان لەسەرناوە.
