بەهۆی دوو گرێبەستی ئیدارەی یانەی بەرشلۆنەوە، فیران ڕیڤیتێری بەڕێوەبەری جێبەجێکاری یانەکە دەستی لەکارکێشاوەتەوە.
دوای ئەوەی یانەی بەرشلۆنە ئاشکرایکرد، کە فیران ڕیڤیتێری بەڕێوەبەری جێبەجێکار و بەرپرسی دۆسیەی دارایی دەستیلەکارکێشاوەتەوە، کەسایەتییەکە ڕایگەیاند، کە ئیدارەی بارسا بەسەرۆکایەتی خوان لاپۆرتا باشترین کاریانکردووە و داهاتوویەکی پرشنگدار چاوەڕوانیان دەکات، هۆکاری وازهێنانەکەشی بۆ هۆکاری تایبەتی گەڕاندووەتەوە.
ئێزگەی کادینا سێری ئیسپانی ئاشکرایکردووە، وازهێنانی ڕیڤیتێر بەهۆکاری تایبەتی نەبووە، بەڵکو ناڕازیبووە لە دوو جوڵەی خوان لاپۆرتا و ئیدارەی بارسا، بەهۆی ناکۆکییەکانەوە دەستی لەکارکێشاوەتەوە.
CEO Ferran Reverter is leaving the club. He will continue in his post until a replacement is found. pic.twitter.com/7ru0smAYqi
— total Barça (@totalBarca) February 8, 2022
یەکەم هۆکاری ناکۆکی نێوان ڕیڤیترێر و لاپۆرتا پەیوەندیی بە کڕینی فیران تۆرێسەوە هەبووە بە بڕی 55 ملیۆن یورۆ، ڕیڤیتێر پێیوابووە، یانەکە ملیارێک و 350 ملیۆن یورۆ قەرزدارە و باشترە خۆپارێزی لە بەکارخستنی پارەدا بکرێت.
دووەم هۆکاریش، ڕێککەوتنی نێوان بەرشلۆنە و کۆمپانیای سپۆتیفای سویدی بووە وەک سپۆنسەری سەرەکیی یانە، ڕیڤیتێر پێیوابووە چاوەڕوانکردن باشترین بڕیارە و بەنزیکی زانیوە بە زیاتر لە 280 ملیۆن ڕێککەوتن لەگەڵ کۆمپانیای گۆڵدن ساکسدا بکەن، بەڵام لاپۆرتا و هاوکارانی ئامادەنەبوون گوێبیستی پێشنیازەکانی بن.
