ئەمڕۆ حەوتەم ساڵڕۆژی ڕزگاركردنی كۆبانێ-یە لە دەست چەكدارانی داعش و گروپە چەكدارەكانی سەر بە توركیا.
لە ناوەڕاستی مانگی ئەیلولی ساڵی 2014دا، دەوڵەتی ئیسلامی لە عێراق و شام “داعش” بە هەزاران چەكدارەوە هێرشەكانی بۆسەر كۆبانێ دەستپێكرد. مانگی دواتری هەمان ساڵ چەكدارانی داعش چوونە ناو كۆبانێ و چەند شوێنێكی گرنگی شارەكەیان داگیركرد، بەڵام لەلایەن شەڕڤانانەوە ڕووبەڕووی بەرگرییەكی توند بووەوە.
سەرباری چڕیی هێرشەكان و زۆریی ژمارەی چەكدارەكان كە چەندین گروپی توندڕەوی سەر بە توركیا و داعش یەكاینگرتبوو، شەڕڤانان نەیانهێشت تەواوی شاری كۆبانێ بكەوێتە دەست داعش و هاوكارەكانی.
لەگەڵ توندتربوونی شەڕەكان و هێرشبردنی زیاتری داعش و هاوكارەكانیدا، بەرگریی شەڕڤانان خۆڕاگرانەتر دەبوو، لە هەمان ئەو قۆناغەشدا هێزی پێشمەرگەی كوردستان وەك هێزی پشتیوانی ڕەوانەی ڕۆژئاوای كوردستان كرا و بە چەكی قورسەوە پشتیوانیی شەڕڤانانیان كرد و ئەوەش وەك شارەزایانی سەربازی ئەوكات باسیان دەكرد، ڕۆڵی هەبوو لە یەكلاكردنەوەی شەڕەكەدا.
جگە لە شەڕڤانان و هێزەكانی پێشمەرگەی كوردستان و ئەو خۆبەخشانەی لە سەرتاسەری كوردستانەوە ڕوویان لە كۆبانێ كردبوو، هێزەکانی هاوپەیمانیی نێودەوڵەتی لەڕێگەی هێرشی ئاسمانییەوە هاوكاربوون لە تیكشكاندنی داعش و گروپە توندڕەوەكانی دیكە و دواجار لە ڕۆژی 26/1/2015دا و دوای 134 ڕۆژ لە بەرخۆدان، كۆبانێ سەركەوت.
ئەو بەرگرییەی لە كۆبانێ كرا، میدیا و ناوەندە سیاسییەكانی جیهانی تەنی و شەڕەكە بوو بە ڕۆژەڤی دامەزراوەكانی میدیا و بە گرنگییەوە لە دۆزەكەیان دەڕوانی، تەنانەت شارەكە بە “ستالینگرادی نوێ” ناوزەدكرا و یەكی تشرینی دووەمی هەموو ساڵێك وەك “ڕۆژی كۆبانێ” دەستنیشانكرا.
