بەپێی لێدوانی بەرپرسانی نەتەوە یەکگرتووەکان بۆ مافی مرۆڤ، بارانبارین و بەفر لە سوریا کاریگەریی ترسناکی کردووەتە سەر ژیانی 250 هەزار ئاوارە کە لەناو کامپەکاندا دەژین، هەروەها ژمارەیەکی زۆر لە خێمەکانیان بەهۆی بەفر و شەپۆلی سەرماوە داڕووخاوە.
مارک کاتس جێگری هەماهەنگیکاری نەتەوە یەکگرتووەکان بۆ کاروباری مرۆیی لە سوریا لە کۆنگرەیەکی ڕۆژنامەوانیی ئۆنلایندا ڕایگەیاند، “ئەو ناوچانە بەڕاستی کارەساتبارن”.
کاتس وتی، باکووری ڕۆژئاوای سوریا، (زیاتر ئەو ناوچانە دەگرێتەوە كە توركیا داگیریكردوون و لەژێر دەستی هێزە چەكدارەكانی سەر بە توركیان)، بەسەختی ڕووبەڕووی کێشە بووەتەوە، بەوپێیەی بە یەکێک لەو شوێنانە دادەنرێت کە دانیشتووانەکەی ڕووبەڕووی مەترسی دەبنەوە لەجیهاندا، ئەو 2.8 ملیۆن کەسەی لەو کامپانەی ناوچەكەدا دەژین “لە باشترین حاڵەتەکاندا لە خراپترین ئاستی ژیاندان، لەبەرئەوەی ناوچەی جەنگە”.
بەرپرسەكەی نەتەوە یەكگرتووەكان ئاماژەی بەوەشکردووە، “لەم کەشە ساردەدا، ڕۆژانە شایەتی بینینی ڕووداوی ترسناکین، زیاتر لە هەزار خێمەی ئاوارەکان بەتەواوی ڕووخاون بەهۆی سەرما و بەفربارینی زۆرەوە، کە پلەی گەرمی گەیشتووەتە حەوت پلە ژێر سفر”.
نەتەوە یەکگرتووەکان باس لەوەدەکات، “زیاتر لە 100 هەزار ئاوارە ڕووبەڕووی دۆخی سەخت بوونەتەوە بەهۆی بەفربارینی زۆرەوە، 150 هەزاریش لەگەڵ ئەوەی لەخێمەدان، پلەکانی گەرما لەو شوێنەی تێیدا دەژین لەئاستی پلەی بەستندایە، واتە لەکۆی ئەو 2.8 ئاوارەیەی ناوچەكە، 250 هەزاریان لەدۆخی زۆر سەختی ژیاندان بەهۆی سەرماوە”.
بۆیە بەرپرسەكەی مافی مرۆڤ لە نەتەوە یەكگرتووەكان بەپێویستی دەزانێت، هاوکارییە داراییەکان بۆ وەرزی زستان لەوناوچانەدا زیاتربکرێن، “چونکە ماوەی 11 ساڵە ئەو کێشانە بەردەوامن”.
داواشی لە کۆمەڵگای نێودەوڵەتی کرد، هاوکاریانبن بۆ ڕزگارکردنی ئەو کەسانە لەو دۆخە سەختە و بردنیان بۆ پەناگەیەکی باشتر بەشێوەیەکی کاتی، “چونکە ئەوەی مامەڵەی لەگەڵدەکەین دۆخێکی کارەساتبارە”.
