بەڕێوەبەری گشتیی ڕێکخراوی تەندروستیی جیهانی هۆشداری دا بە وڵاتانی جیهان کە بەشێوەیەکی جددی مامەڵە لە کۆتاییهێنان بە دۆخی سەختی کۆرۆنا بکەن، وتیشی، ئێستا سەرجەم ئامرازەکانی ئەو کارەمان هەن.
تیدرۆس ئەدهانۆم گیبریسوس لە کۆنگرەیەکی ڕۆژنامەوانیدا ڕایگەیاند، “کۆرۆنا پێدەنێتە ساڵی سێیەمییەوە و ئێمە لە قۆناغێکی مەترسیدارداین، پێویستە بە وریاییەوە مامەڵەی لەگەڵدا بکەین چونکە ئەمە قۆناغێکی سەختە لە پەتاکە”.
وتیشی، “ناکرێت ڕێگەبدەین کۆرۆنا بەردەوامبێت و ئێمە لەنێوان مەترسی و پشتگوێخستندابین”.
ژمارەی تووشبووانی کۆرۆنا لە جیهاندا ژمارەی پێوانەیی پێشووتری تێپەڕاندووە و تەنها ئەمڕۆ 1.44 ملیۆن کەس لە جیهاندا تووشی پەتاكە بوون، هۆكارەكەشی بڵاوبوونەوەی بەرفراوانی گۆڕاوی ئۆمیکرۆنەوە کە زۆرترین توانای بڵاوبوونەوەی هەیە بە بەراورد بەوانەی پێشوو.
