فڕۆكە جەنگییەكانی عێراق لە بۆردوومانێكدا سێ چەكداری داعشیان لە نێوان قەزاكانی تاجی و حەویجەی سەر بە پارێزگای كەركوك كوشت، كە یەكێكیان سەركردەبووە لە ڕێكخراوەكەدا.
شانەی ڕاگەیاندنی ئەمنیی عێراق بڵاویكردەوە، دوای بەدواداچوونی ورد و لێكۆڵینەوەی هەواڵگری لەسەریان، فڕۆكە جەنگییەكانی عێراق ئۆتۆمبێلێكی لە جۆری “پیكاب”ی چەكدارانی داعشی لەنێوان قەزاكانی تاجی و حەویجە كردووەتە ئامانج و بەهۆیەوە سێ چەكداری داعش كوژراون.
ئاماژەی بەوەشكردووە، یەكێك لە كوژراوەكان كە ناوی “ئەبوعەسام” بووە، بەرپرسی بەشی “قاتع” دیجلەی ڕێكخراوەكە بووە.
شانەی ئەمنی باسیلەوەشكردووە، ئەو ئۆتۆمبێلەی لەلایەن فڕۆكە جەنگییەكان كراوەتە ئامانج لەلایەن چەكدارە داعشەكانەوە بۆمبڕێژكرابوو و ئامادەكرابوو بۆ تەقاندنەوەی.
