لەماوەی تەنها دوو هەفتەدا چوار کچی کوردی خەڵکی ڕۆژهەڵاتی کوردستان بەهۆی هەڵوێست و پارێزگاریکردن لە شوناسی کوردانەیان، گواستراونەتەوە بۆ زیندان، یاخود بە بەڵگەنامەی کاتی ئازادکراون.
لەناو دۆسیەی موژگان کاوسی، کەژاڵ نەسری، شنە ئەحمەدی و زارا موحەمەدی-دا، دۆسیەی زارا موحەمەدی زۆرترین کاردانەوەی لێکەوتەوە، ئەوەش دوای ئەوەی ئەو کچە چالاکە کوردە ماددەی ڕێگەپێدانی ئازادبوونی هەڵوەشێندرایەوە و داوایلێکرا خۆی ڕادەستبكاتەوە بۆ بەسەربردنی سزاكەی، کە پێنج ساڵ زیندانییە.
لە دۆسیەی زارا نوێتر، ئازادبوونی کەژاڵ نەسری-یە، کە دوای مانگرتنی دوو ڕۆژەی دایکی کەژاڵ لەبەردەم دەرگای ئیتلاعاتی سنە، ئەو چالاکە فەرهەنگییە بە بارمتە ئازادکرا.
کەژاڵ نەسری چالاکی فەرهەنگی و مەدەنی خەڵکی گوندی تەنگیسەری، دوای یەک مانگ دەستگیرکردنی لەلایەن هێزە ئەمنییەکانەوە بە بەڵگەنامەی کاتی و بە دانانی بارمتەی 100 میلیۆن تمەن، بەشێوەی کاتی ئازاد کرا، پێشتریش بەهەمان شێوە زارا موحەمەدی ئازادکرابوو.
هەروەها موژگان کاوسی، چالاکی مەدەنی کورد لە ڕۆژهەڵات، دوای ئەوەی ساڵی 2019 بەهۆی پشتگیریکردن لە ناڕەزایەتییەکانی خەڵکی ڕۆژهەڵات دەستگیرکرا، دوای چەند ساڵێک مانەوەی لە زیندان، بە بەڵگەنامەی کاتی ئازادکرا.
موژگان کاوسی، یەکێکی دیکە بوو لە ژنە چالاکەکانی ڕۆژهەڵات و دوای ڕووبەڕووکردنەوەی چەند تۆمەتێك لەلایەن دادگاکانی ئێرانەوە و بەسەربردنی زیندانییەکەی، بە بەڵگەنامەی کاتی ئازادکرا.
شنە ئەحمەدی، کچێكی گەنجی چالاکی خەڵکی پاوەیە لە ڕۆژهەلاتی کوردستان و دوای بانگکردنی بۆ دادگای ئەو شارە، پێیان ڕاگەیاندووە دەبێت سێ مانگ زیندانیکردن بەسەربەرێت.
بە وتەی سەرچاوەیەکی نزیک لە بنەماڵەی كچە چالاكوانە گەنجەكە، شنە ئەحمەدی دوای دەستبەسەرکران بۆ ناوەندی چاکسازی و بارهێنانی کرماشان گوازراوەتەوە.
