حكومەتی كازاخستان دەڵێت، هەشت هەزار چەكدار دەستگیركراون و ئێستا دۆخی وڵاتەكە لەژێر كۆنترۆڵدایە، زیانە داراییەكانی توندوتیژییەكانی ڕۆژانی ڕابردووش ئاشكرادەكات.
دوای چەند ڕۆژێك لە توندوتیژییەكانی كازاخستان، حكومەتی ئەو وڵاتە ڕایگەیاند، “لە ئەمڕۆ 10ی كانونی دووەمەوە دۆخی كازاخستان جێگیرە و لەژێر كۆنترۆڵدایە، كۆتاییمان بە ناوەندەكانی هەڕەشە تیرۆریستییەكان هێناوە و هەموو دامەزراوەكان لەژێر كۆنترۆڵی حكومەتدان”.
بەپێی ڕاگەیەندراوی فەرمیی حكومەتی كازاخستان، هێزەكانی حكومەت شوێنەكانی داڵدەدانی چەكداران و ئەوانەی بەشداریی “پشێوییەكان”یان كردبوو “پاكدەكەنەوە”.
قەبارەی زیانە داراییەكانی توندوتیژی و پشێوییەكان، تا ئەمڕۆ گەیشتووەتە 215 ملیۆن دۆلار، وەك ڕاگەیەندراوی حكومەتی كازاخستان دەڵێت.
هەر ئەمڕۆ وەزارەتی ناوخۆی كازاخستان ڕایگەیاند، هەشت هەزار چەكدار دەستگیركراون و هێزەكانی پۆلیس و ئاسایش دەستیان بەسەر ئەو چەكانەدا گرتووە كە چەكدارەكان “تاڵانیانكردبوون”.
