كۆمپانیای گەنەڵ ئێنەرجیی بەریتانی تایبەت بە بواری نەوت و وزە ڕایگەیاند، پرۆسەی لێدانی بیرەنەوتی ژمارەی دووی ناوچەی قەرەداغی ڕاگرتووە.
كۆمپانیاكە لە ڕاگەیەندراوێكدا هۆكاری ڕاگرتنی پرۆسەكە بۆ كێشەی تەكنیكی دەگەڕێنێتەوە كە بە وتەی خۆی “ناتوانێت بە ئاسانی چارەسەریبكات و هەوڵەكانی بەردەوامن بۆ چارەسەركردنی كێشەكە”.
ڕوونیكردەوە، سەختیی پێكهاتەی خاكی ئەو ناوچەیە ڕێگربووە لە كونكردنی زەوی و هەڵكەندنی بیرەنەوتەكە.
بیڵ هیگس بەڕێوەبەری جێبەجێكار لە كۆمپانیای گەنەڵ ئێنەرجی، هۆكاری ڕاگرتنی هەڵكەندنی بیرەنەوتەكەی بۆ سەختیی پێكهاتەی خاكی ناوچەكە و هەڵكەوتەی جیۆلۆجی گەڕاندووەتەوە و دەڵێت، “بەدڵنیاییەوە ئەو دەرئەنجامە نەبوو كە ئێمە دەمانویست، بەڵام هەڵكەوتەی جیۆلۆجیی قەرەداغ وەك خۆی بە جوانی دەمێنێتەوە”.
بەپێی ڕاگەیەندراوەكە، گەنەڵ ئێنەرجی بەهاوبەشی لەگەڵ كۆمپانیای شیڤرۆنی ئەمریكی هەڵسەنگاندن بۆ دۆخی بیرەنەوتەكە دەكەن و ئەنجامەكانی لەمساڵدا ڕادەگەیەندرێت.
