پەیامنێری تۆڕی میدیایی ئێستا ڕایگەیاند، لە گەڕەکی ڕزگاری لە سلێمانی، دوای ئەوەی هێزە ئەمنییەکان ڕۆیشتوون بۆ دەستگیرکردنی بازرگانێکی ماددەی هۆشبەر، تۆمەتبارەکە ڕووبەڕووی هێزەکان بووەتەوە و کارمەندێکی ئاسایش برینداربووە، دواتر تۆمەتبارەکە دەستگیرکراوە.
یاسین سەمیع، وتەبێژی ئاسایشی سلێمانی، بە تۆڕی میدیایی ئێستای ڕاگەیاند، لەکاتێکدا ھێزەکانی ئاسایشی سلێمانی لەسەر فەرمانی دادوەری لێکۆڵێنەوەی ئاسایشی سلێمانی هەوڵیاندا کە تۆمەتبارێکی ماددەی ھۆشبەر، کە بازرگانی بە ماددەی ھۆشبەرەوە دەکرد، دەستگیربکەن، لە ئەنجامدا ڕووبەڕووی ھێزەکانی ئاسایشی سلێمانی بووەوە و بووەھۆی بریندارکردنی یەکێک لە کارمەندانی ئاسایشی سلێمانی، بەڵام ھێزەکانی ئاسایشی سلێمانی بەزووترینکات کۆنترۆڵی دۆخەکەیان کردووە و تۆمەتبارەکەیان دەستگیرکردووە.
بەپێی زانیارییەکان کاتێک هێزەکان ڕۆیشتوونەتە نزیک ماڵی تۆمەتبارەکە، تۆمەتبارەکە خۆی نەداوە بەدستەوە و بە چەک ڕووبەڕووی هێزەکە بووەتەوە.
