یەكێك لە سەركردەكانی چێوەی هەماهەنگی دەڵێت، لەگەڵ كورد و سوننە و سەدر دانوستاندن دەكەن و هەوڵی هەڵبژاردنی كاندیدانی سێ سەرۆكایەتییەكە دەدەن.
گاتع ڕكابی سەركردە لە دەوڵەتی یاسا ئەمڕۆ شەممە ڕایگەیاند، سەركردەكانی چێوەی هەماهەنگی هەوڵدەدەن هاوپەیمانیی پێكبهێنن و لەبارەی هەڵبژاردنی كاندیدانی سێ سەرۆكایەتییەكەوە ڕێكبكەون.
بەپێی وتەی ڕكابی، لیژنەیەكی باڵا پێكهێنراوە كە هەموو لایەنەكانی چێوەی هەماهەنگی لەخۆدەگرێت و ئەركی سەردانی هێزە سیاسییەكانە، لەوانە حزبە كوردییەكان و هەردوو هاوپەیمانیی عەزم و تەقەدومی سوننییەكان.
چێوەی هەماهەنگی ئەو لایەنە شیعییانە لەخۆدەگرێت كە ناڕازین لە ئەنجامەكانی هەڵبژاردن و لەلایەن مالكی و عامری و عەبادی و حەكیم و خەزعەلی-یەوە ڕابەرایەتی دەكرێت، ناكۆكیی سەرەكییان لەگەڵ ڕەوتی سەدر بە ڕێبەرایەتیی موقتەدا سەدرە چونكە ئەو براوەی یەكەمی هەڵبژاردنە.
گاتع ڕكابی ئاشكرایكرد، ئەركێكی تری لیژنەكەی چێوەی هەماهەنگی، سەردانكردنی موقتەدا سەدرە بۆ كۆبوونەوە و دانوستاندن لەگەڵ ڕەوتی سەدر.
هەفتەی ڕابردوو سەرچاوەیەك لە چێوەی هەماهەنگی ڕایگەیاندبوو، لە چەند ڕۆژی داهاتوودا كۆبوونەوەیەك لە ماڵی موقتەدا سەدر لە نەجەف دەكرێت بۆ چارەسەركردنی كێشەكان و گەیشتن بە ئەنجامی ڕازیكەر.
