حەسەن كەعبی، جێگری یەكەمی سەرۆكی پەرلەمانی عێراق، پێشوازی لە شاندی تیمی نێودەوڵەتیی لێكۆڵینەوە لە تاوانەكانی داعش كرد كە سەر بە نەتەوە یەكگرتووەكان-ـە.
شاندەكە كە كەریم خان، ڕاوێژكاری تایبەتی نەتەوەیەكگرتووەكان و سەرۆكی تیمی سەر بە نەتەوەیەكگرتووەكان بۆ لێكۆڵینەوە لە تاوانەكانی داعش سەرۆكایەتی دەكرد، لەگەڵ جێگیری سەرۆكی پەرلەمان و ئەندامانی لیژنەی یاسایی پەرلەمانی عێراق دا، باسیان لە گرنگیی پێكهێنانی تیمەكە و دادگای تایبەت بە لێكۆڵینەوە لە تاوانەكانی داعش كردووە، كە كارێكی هەرە گرنگیان، پێكهێنانی لیژنەیەكە لە عێراق بۆ ئەوەی كارەكانیان بۆ بەجێبهێنێت و لێكۆڵینەوە لەبارەی تاوانەكانی داعش-ەوە بكات.
بە گوێرەی ڕاگەیاندراوی نووسینگەی ڕاگەیاندنی جێگری سەرۆكی پەرلەمان، حەسەن كەعبی ڕایگەیاندووە، “داعش تاوانی هەمەچەشنی ئەنجامداوە، كە لەڕووی ژمارە و جۆرەوە جیاوازبوون لە تاوانەكانی ڕێكخراوی تیرۆریستیی قاعیدە، وەك كوشتنی خەڵكی بێتاوان لە پەیڕەوكاران و ئەندامانی هەموو ئایین و ئایینزا و نەتەوەكان، سەرباری ئەوەی شوێنەوارەكان و مزگەوت و پەرستگە و كڵێسا و گڵكۆكان-یش بەدەر نەبوون لە تاوانەكانی داعش، تاوانی سووتاندن و دزی و ڕووخاندن و وێرانكردنیان بەرامبەر ئەنجامدراون، تەنانەت تاوانكارییەكانیان گەیشتن بە ڕادەی دەستدرێژیكردنە سەر شكۆی مرۆڤ و مافەكانی، بە جۆرێك كە ژنانیان لاقەدەكرد و لە بازاڕی كەنیزەك-دا دەیانفرۆشتن.”
جێگری یەكەمی سەرۆكی پەرلەمانی عێراق وتوویەتی، “بۆچوونی هاوبەش هەن لەنێوان پەرلەمانی عێراق و ڕێكخراوی نەتەوەیەكگرتووەكان-دا بۆ بە تاوانناساندنی تاوانەكانی داعش لە عێراق، ئەوەش چەندین ڕەهەندی ناوخۆیی و نێودەوڵەتی دەبێت، چونكە لە لایەك دادگا هەوڵی گەڕاندنەوەی مافەكانی هەموو زیانلێكەوتووانی داعش دەدات، ڕەهەندەكەی تریش یەكخستنی هەوڵەكانە لەسەر ئاستی نێودەوڵەتی بۆ بەگژداچوونەوەی هەموو بیرە توندڕەوەكان.”
