وەزیری سەرچاوەكانی ئاوی عێراق دەڵێت، “ئێران ڕێڕەوی چەند ڕوبارێكی گۆڕیوە و ئەوەش ئاوی عێراقی كەمكردووە.”
ڕەشید حەمدانی، وەزیری سەرچاوەكانی ئاوی عێراق، پێنجشەممە 5ی تشرینی دووەم ڕایگەیاند، “عێراق ئاوێكی زۆری گلداوەتەوە، ئەگەر ئەوە نەبووایە، بەهۆی مامەڵەكردنی ئێران لەگەڵ سەرچاوەكانی ئاودا، دووچاری كەمئاوی و وشكەساڵی دەبووین.”
حەمدانی ئەو قسانەی لە لێدوانێكدا كرد و ئاشكرایكرد، “ئێران ڕێڕەوی چەند ڕوبارێكی گۆڕیوە، ژمارەیەك تونێلیشی هەڵكەندووە، ئەوانەش بوونەتە هۆی كەمبوونەوەی ئاوی عێراق.”
بە وتەی وەزیری سەرچاوەكانی ئاوی عێراق، 40 ڕووبار و چەم و جۆگەلە لە ئێرانەوە دەڕژێنە عێراق و بەشێكیان وەرزیین و هەندێكی تریشیان ئێران ڕێڕەوەكانیان دەگۆڕێت، “بۆیە باشترین چارەسەر، گەڕانەوەیە بۆ ڕێككەوتننامەی ساڵی 1975 و جێبەجێكردنی، یاخود سوودوەرگرتن لێی لەپێناو لێكتێگەیشتندا.”
