دوای دوورخستنەوەی سۆلشایەر، چوار كەس بۆ پۆستی ڕاهینەرایەتیی یانەی مانچستەر یونایتد پاڵێوراون، ئیدارەی یانەكە لە ئێستادا لەگفتوگۆدایە بۆ پڕكردنەوەی جێگەی ڕاهێنەرە دوورخراوەكە.
دواجار ئیدارەی مانچستەر یونایتد بڕیاریدا بەهۆی ئەنجامە خراپەكانی یانەكەیەوە، دەستبەرداری سۆلشایەری ڕاهێنەر ببێت، لە ئێستادا بۆ جێگەكەی، كەوتۆتە گفتوگۆ لەگەڵ چەند ڕاهێنەرێكدا.
بە پێی ڕاگەیاندنەكان، چوار كەس بۆ جێگەكەی سۆلشایەر پاڵێوراون.
زەینەدین زێدان
بژاردەی یەكەمی یانەی مانچستەر یونایتد زێدانی فەڕەنسی و ڕاهێنەری پێشووی ڕیاڵ مەدریدی ئیسپانییە، بەڵام كێشەكە ئەوەیە كە خێزانەكەی زێدان حەزی بە ژیانكردن لە ئینگلتەرا نییە.
ڕاگەیاندنەكان ئاماژە بەوە دەدەن ئیدارەی مانچستەر یونایتد گفتوگۆی لەگەڵ زێدان كردووە، بەڵام ئەو بە بیانووی پشوو وەرگرتن، ڕەتیكردووەتەوە پۆستەكە وەربگرێت.
لە ئێستاشدا گفتوگۆكان لەو بارەیەوە بەردەوامن.
براندان ڕۆجەرس
یەكێكی تر لە پاڵێوراوەكان بۆ جێگرەوەی سۆلشایەر، براندان ڕۆجەرس-ی ڕاهێنەری لیستەر سیتییە، بەڵام ئەو ڕاهینەرە دوێنێ پاش شكستی یارییەكەی چێڵسی، جەختی لەوە كردەوە كە لە لیستەر دڵخۆشە و بەنیازی جێهێشتنی یانەكەی نییە.
جولیان لۆپیتیگی
لۆپیتیگی لە ئێستادا ڕاهێنەری یانەی ئیشبیلییەی ئیسپانییە و یانەكەش ئاستێكی بەرز پێشكەشدەكات لە خولی ئیسپانیادا.
لۆپیتیگی یەكێكە لەو ڕاهێنەرانەی بۆ بەرەوپێشبردنی یانەكان زۆر گونجاوە و ئیدارەی مانچستەر یونایتدیش گفتوگۆی لەگەڵ كردووە بۆ ئەوەی جێگەی سۆلشایەر بگرێتەوە، بەڵام نەگەیشتوونەتە ڕێككەوتنی كۆتایی.
لۆران بلان
لۆران بلان-ی فەڕەنسی پێشتر یاریزانی مانچستەر یونایتد بووە و دواتر كە وازی لە یارییكردن هێناوە، چەند ئەزموونێكی ڕاهێنەرایەتیی تاقیكردووەتەوە، بەڵام لەهیچیان سەركەوتوو نەبووە.
ئیدارەی یانەی مانچستەر یونایتد وەك بژارەدەیەك گفتوگۆی لەگەڵ كردووە و ڕای ئەو ڕاهێنەرەی لەبارەی وەرگرتنی پۆستی ڕاهێنەرایەتیی یانەكەوە وەرگرتووە.
بژاردەی یەكەمی مانچستەر یونایتد زێدانی فەڕەنسییە، بەڵام باری خێزانی ڕێگرە لە وەرگرتنی پۆستەكە، بژاردەی دووەمیش براندان ڕۆجەرسە، بەڵام ئەویش مانەوەی خۆی لە لیستەر سیتی دووپاتكردووەتەوە.
بەشێوەیەكی كاتی مایكل كاریك سەرپەرشتیی مانچستەر یونایتد دەكات تا ئەوكاتەی ڕاهێنەرێك بۆ جێگەكەی سۆلشایەر دەدۆزرێتەوە.
