دادگای تاوانەكانی بابل سزای زیندانیكردنی بەسەر چەند كەسێكدا سەپاند كە هەوڵیان دابوو خانوبەرەی جووەكان بفرۆشن.
بڕیارەكە ئەمڕۆ چوارشەممە دراوە، سزادراوەكان ئەندامانی باندێكن و دەیانویست لەڕێگەی ساختەكردنی بەڵگەنامە و بەرتیلپێدان و دەركردنی نووسراوی ساختەوە، خانوبەرەی چەندین كەسایەتیی جووی عێراقی بفرۆشن.
بەپێی زانیارییەكان، خانوبەرەكان لە شاری حلەن و خاوەندارێتییان دەگەڕێتەوە بۆ ئەو جووانەی پێشتر دانیشتووی شارەكە بوون و ئێستا لە دەرەوەی عێراقن.
ڕاگەیەندراوی دادگای تاوانەكانی بابل دەڵێت، “تۆمەتبارەكان سزای زیندانیكردنی ماوە جیاوازیان بەسەردا سەپێندراوە”، بەبێ ئەوەی ساڵەكانی زیندانیكردن ئاشكرابكات.
ڕوونیكردووەتەوە، دادگا و ئاسایشی نیشتمانی زانیارییان لەبارەی باندەكەوە كۆكردووەتەوە و توانیویانە بەرلەوەی تۆمەتبارەكان خاوەندارێتیی موڵك و خانووەكان بگۆڕن، دەستگیریانبكەن.
