وەزیری سەرچاوەكانی ئاوی عێراق ڕایدەگەیەنێت، لە ماوەیەكی نزیكدا دۆسیەی ئاو لەگەڵ توركیا یەكلایی دەكەینەوە.
مەهدی ڕەشید حەمدانی، وەزیری سەرچاوەكانی ئاوی عێراق ئەمڕۆ چوارشەممە 28ی تشرینی یەكەم ڕایگەیاند، دۆسیەی دانوستانەكان لەگەڵ وڵاتانی دراوسێ سەبارەت بە پشكی ئاوی عێراق، زیاتر لە 35 ساڵە بەردەوامە و متمانەمان هەیە بەوەی بەمنزیكانە دۆسیەی ئاو لەگەڵ توركیا یەكلایی بكەینەوە.
حەمدانی، لە لێدوانێكدا بۆ ئاژانسی هەواڵی فەرمی عێراق وتیشی، “عێراق و توركیا خواستی سیاسیی و ڕاستەقینەیان هەیە بۆ یەكلاییكردنەوەی دۆسیەی ئاو”.
ئەوەشی خستەڕوو، ڕەجەب تەیب ئەردۆغان، سەرۆككۆماری توركیا نێردەی تایبەتی خۆی بە ئامانجی یەكلاییكردنەوەی دۆسیەی ئاو ناردبووە عێراق، ئێستاش لای خۆمانەوە لە ئەنجومەنی وەزیران بەردەوامین لە ئامادەكردنی ڕەشنووسی پرۆتۆكۆلێک بە ئامانجی دیاریكردنی پشكی ئاوی خۆمان لە ڕووباری دیجلە.
