پرۆسەی دابەشکردنی نەوتی سپی ماڵان بەردەوامە و ڕۆژی دووشەممەی داهاتوو دابەشكردنی نەوت دەگاتە سەنتەری شاری سلێمانی.
محەمەد حەسیب، بەڕێوەبەری نەوت و کانزاکانی سلێمانی بە تۆڕی میدیایی ئێستای ڕاگەیاند، “ڕۆژی دووشەممە 1/11 نەوتی سپی دەگاتە سەنتەری شاری سلێمانی و دەست بە دابەشکردنی دەکرێت”.
دووشەممە مەڵبەندەكانی پێنج و شەشی ناوشار دابەشدەكرێت.
بەڕێوەبەری نەوت و کانزاکانی سلێمانی ڕاشیگەیاند، “بڕیارە سبەی یەکشەممە نەوت لەسنووری قەزای پشدەر و ناحیەکانی دابەشبکرێت، هەرخێزانێک بڕی 200 لیتری بەنرخی 55 دینار پێدەدرێت”.
هاوکات زانا محەمەد، بەڕێوەبەری قەزای پێنجوێن بە تۆڕی میدیایی ئێستای ڕاگەیاند، “دابەشكردنی نەوت لە سنووری قەزاکەی ئێمە تەواو بووە و تەنها دوو تانکەرمان ماوە، بڕیارە سبەی بگاتە سنوورەکە و كۆتایی بەدابەشكردنی نەوت لە قەزاكە دێت”.
ماوەی زیاتر لە هەفتەیەکە دابەشکردنی نەوتی سپی ماڵان دەستیپێکردووە، ئەگەرچی وەزارەتی سامانە سروشتییەکان بەڵێنی سەرەتای ئەم مانگەی دابوو.
