وتەبێژی بەڕێوەبەرایەتیی بەرگریی شارستانیی سلێمانی داوا لە هاوڵاتییان دەكات هاوشێوەی باڵەخانە بازرگانییەكان و شوێنەكانی دیكە پابەندی ڕێنماییەكان بن كە بۆ سیستمی غاز پەیڕەودەكرێت و ئاشكرایدەكات ڕێوشوێنی پێویست لە پێناو سەلامەتیی گیانی هاوڵاتییان دەگیرێتەبەر.
ڕائید ئارام عەلی وتەبێژی بەڕێوەبەرایەتیی بەرگریی شارستانيی سلێمانی لە لێدوانێكدا بە تۆڕی میدیایی ئێستای راگەیاند، سەرجەم ئەو باڵەخانە و ناوەندە بازرگانییانەی كە سیستمی غازیان بۆ دانراوە پابەندی مەرج و ڕێنماییەكانن و بەردەوام بە دواداچوونیان بۆ دەكرێت بۆیە ئەگەر ئەو ڕێنماییانە بۆ ئەو ماڵانەش جێبەجێبكرێت كە سیستمەكەیان داناوە لە پێناو سەلامەتیی گیانی هاوڵاتییاندایە.
ئاماژەی بۆ ئەوەش كرد، دانانی سیستمی غاز مەترسیدارە بۆیە پێویستە بە وریاییەوە مامەڵەی لەگەڵ بكرێت و ئەو ڕێنماییانەی كە بۆ باڵەخانە و ناوەندە بازرگانییەكان پەیڕەودەكرێت و هاوڵاتییانیش بۆ ماڵەكانیان پێوەی پابەندبن و چەند ڕێوشوێنێكی پێویستیش بۆ ئەو مەبەستە دەگیرێتەبەر.
