وتەبێژی پارتی ڕایدەگەیەنێت، ئەو هەواڵانەی لەبارەی گۆڕانكاری و ئاڵوگۆڕ لە بەرپرسی هەندێك لە ئۆرگانەكاندا باسدەكرێت، هیچ بنەمایەكیان نییە.
مەحمود محەمەد، وتەبێژی پارتی دیموکراتی کوردستان ڕوونكردنەوەیەكی بڵاوكردەوە و تیایدا هاتووە، “چەند ڕۆژێکە ژمارەیەک ماڵپەڕ و پەیجی دیاریکراو ھەواڵێکی دوور لە ڕاستی بڵاودەکەنەوە لەبارەی گۆڕانکاری و ئاڵوگۆڕکردن لە ھەڤاڵانی بەرپرسی ئۆڕگانەکانی پارتیمان لە سنووری پارێزگای سلێمانی بەتایبەتی، ھەندێ شوێنی دیکە بەگشتی”.
دەشڵێت، “ئەم بابەتە ھیچ بنەمایەکی نییە و تاوەکو ئێستا بڕیاری ھیچ جۆرە گۆڕانکارییەک نەدراوە”.
لە ڕوونكردنەوەكەدا وتەبێژی پارتی داوا لەو میدیایانە دەكات “لە خەمی ڕاستگۆیی کەناڵەکانیان بن و ھەواڵی دوور لە ڕاستی بڵاونەکەنەوە”.
