سەرۆکی ناوەندی ڕووبەڕووبوونەوەی وشکەساڵی لە ئێران ڕایگەیاند، تا سەرەتای زستان چاوەڕوانی بارانبارین ناکەن و پایزێکی کەمبارانیان لەپێشە.
ئەحەد وەزیفە، سەرۆکی ناوەندی ڕووبەڕووبوونەوەی وشکەساڵی لە ئێران بە ئاژانسەکانی وڵاتەکەی ڕایگەیاندووە، “ئەم پایزە وەرزێکی کەمباران دەبێت بۆ ئێران و چاوەڕێدەکرێت لە زستاندا باران ببارێت، هەرچەندە ناتوانرێت ئومێدی گەورە بە زستانیش هەبێت بۆ بڕی بارانی پێویست”.
سەرۆکی ئەو ناوەندە پێشبینی ئەوەش دەکات، ئەگەر کەشوهەوا بۆ بارانبارین لەباربێت و بارانبارین لە زستاندا بگاتە ئاستی ئاسایی، ئەوا وشکەساڵی هاوشێوەی ئەمساڵ زیانی زۆر نابێت.
بەپێی پێوەرەکانی ناوەندەکە، ئاستی بارانبارین لە ناوچەکانی ئێران بۆ ئەم پایزە نەگەیشتووەتە سەروی 10 ملیم و ئەوەش نیشانەی ئەوەیە ئەم پایزە وەرزێکی تەڕنابێت.
لە هەرێمی کوردستانیش وەک دراوسێیەکی ئێران، تا ئێستا هاوڵاتییان چاوەڕێی دەستپێکردنی باران دەکەن و پێشبینییەکانی کەشوهەواش وانیشانی دەدەن، تا کۆتایی ئەم مانگە بارانبارین هەرێمی کوردستان ناگرێتەوە.
