حزبێكی دیكە ئەنجامی هەڵبژاردن ڕەتدەكاتەوە

ئەنجامەكانی كۆمسیۆن بە نادروست ناودەبات

یەكێكی دیكە لە حزبە بەشداربووەكانی هەڵبژاردنی ئەنجومەنی نوێنەران ئەو ئەنجامەی لەلایەن كۆمسیۆنەوە ڕاگەیەنرا بە نادروست ناودەبات و دەڵێت، كاندیدەكانی شكستیان نەهێناوە، بەڵكو بە هەوڵی هاوبەشی لایەنە جیاوازەكانی ناوخۆ و دەرەوە دوورخراونەتەوە.

حزبی ئیسلامی عێراقی ئەمڕۆ ڕاگەیەنراوێكی بڵاوكردەوە و تیایدا هاتووە، بە ئامانجگرتنەكەی بۆ لێدان بووە لە نوێنەرایەتیی ناسنامەی ئیسلامیی نیشتمانیی سیاسی و دەڵێت، ئەو ئەنجامانە بەتەواوی ڕەتدەكەینەوە كە ڕاگەیەنراوە و دووپاتیدەكەینەوە كە پێشتر ساختەكراوە بە ڕێوشوێنێك كە ئامانج لێی وەك ئەوەی دەردەكەوێت گەڕانەوەی پێكهاتەی گۆڕەپانی سیاسیی عێراقە بۆ ئامانجی دیاریكراو.

حزبەكە ئاماژە بۆ ئەوەشدەكات داننان بەم هەڵبژاردنەدا كە “گومان و نادڵنیایی لە سەرەتایەوە تا كۆتایی دەوری گرتووە هەڵەیەكی گەورەیە، پێویستە نەكەوینە ناویەوە و پێویستە هێزە سیاسییەكان نەچنە ژێرباری”.

پێشتر هەریەك لە هاوپەیمانی فەتح و حزبوڵای عێراقی ئەنجامی هەڵبژاردنەكانیان ڕەتكردەوە.

پارتی ئیسلامی یەكێك لە حزبە سونییەكانی عێراق كە لە ساڵی 1960 دامەزراوە، جارێكی دیكە لە ساڵی 1991 لە لەندەن دامەزراوە و لە 2003 گەڕاوەتەوە بۆ عێراق.

بەپێی ئەنجامی بەرایی هەڵبژاردنی پێشوەختەی ئەنجومەنی نوێنەرانی عێراق لەنێو سوننەكاندا هەریەك لە هاوپەیمانی (تەقەدوم)ی محەمەد حەلبووسی و هاوپەیمانی (عەزم)ی خەمیس خەنجەر زۆرترین دەنگیان بەدەستهێناوە.

لە هەڵبژاردنەكەدا ڕەوتی سەدر بەسەرۆكایەتیی موقتەدا سەدر 73 كورسی و هاوپەیمانیی “تەقەدوم” بەسەرۆكایەتیی محەمەد حەلبووسی 41 كورسی و هاوپەیمانیی دەوڵەتی یاسا بەسەرۆكایەتیی نوری مالكی 37 كورسییان بەدەستهێناوە.

بابەتی پێشتر

زانیاریی نوێ لەبارەی هەڵوەشاندنەوەی بزوتنەوەی گۆڕان

بابەتی دواتر

هەڵوێستی مستەفای سەید قادر لەبارەی كشانەوەی گۆڕان لە حكومەت

بابەتی پەیوەندیدار
Total
1
Share