کۆمپانیای مایکرۆسۆفت ئاشکرایکرد، هاککەرەکانی پەیوەست بە ئێران توانیویانە سەرکەوتووبن لە هاککردنی ژمارەیەک کۆمپانیای تایبەت بە تەکنەلۆژیای بەرگری لە ئەمریکا و ئیسرائیل و هەندێک لە وڵاتانی کەنداو.
لە ڕاگەیەندراوێکدا کۆمپانیای مایکرۆسۆفت بڵاویکردەوە، هاککەرەکان هەوڵیانداوە بچنە ناو هەژمارەکانی Office 365 سەر بە کۆمپانیا ئەمنییەکانی ئەمریکا و ئیسرائیل، لەناویاندا کۆمپانیاکانی تایبەت بە دروستکردنی مانگە دەستکردەکان، ڕادار و فڕۆکەی بێفڕۆکەوان.
ناوەندی مایکرۆسۆفت بۆ هەواڵگریی MSTIC ڕایگەیاندووە، ئەو گروپە توانیویانە 250 هەژمار لە هەژمارەکانی Microsoft Office 365ی سەربە ئەمریکا و ئیسرائیل و یەکێتیی ئەوروپا تێپەڕێنن لەڕێگەی هەڵمەتێکی فراوانی هاککردنی ژمارە تێپەڕەکانەوە.
لەگەڵ ئەوەشدا گروپە هاککەرەکان چوونەتە ناو سیستمی زانیارییە جیۆگرافییەکان GIS و بەندەرەکانی چوونە ناوەوەی هەندێک لە وڵاتانی کەنداو و هەندێک لە کۆمپانیاکانی گواستنەوەی دەریایی خۆرهەڵاتی ناوەڕاست.
مایکرۆسۆفت دەڵێت، چالاکییەکانی ئەو گروپە هاککەرە، کە ناویان DEV-0343ــیە لەبەرژەوەندی ئێران کاردەکەن، بۆ پەرەپێدانی تەکنیکەکانی هێزە ئەمنی و سەربازییەکانی ئێران.
لەناو ئەو کۆمپانیایانەی گروپەکە هاکیانکردوون، کۆمپانیاکانی بەرگریی سەر بە ئەمریکا، یەکێتیی ئەوروپا و ئیسرائیل لەخۆدەگرن کە بەرهەمهێنەری ڕادار، فڕۆکەی بێفڕۆکەوان، سیستمی مانگە دەستکردەکان، سیستمی وەڵامدانەوەی باری لەناکاون.
