ئەگەرێکی بەهێز لەئارادایە، لە گواستنەوەکانی زستانەی 2022 چوار یاریزانی یانەی ڕیاڵ مەدرید ڕوو لە یانەکانی دیکە بکەن.
ڕۆژنامەی سپۆرتی ئیسپانی لەزاری سەرچاوە ناوخۆییەکانی یانەی شاهانەی مەدریدەوە ئاشکرایکردووە، ئیدارەی مێرەنگی ئامادەییان دەربڕیوە لە میرکاتۆی زستانەی 2022دا دەستبەرداری چوار یاریزان بن کە سوودێکی ئەوتۆیان بۆ پلانەکانی کارلۆ ئەنچلۆتی نەبووە.
ماریانۆ دیاز، ئیسکۆ، لوکا یوڤیچ و دانی سیبایۆس لەو یاریزانانەن کە دەرگای یانە بەڕوویاندا واڵاکراوە، تاوەکو یانەیەکی دیکە بۆخۆیان بدۆزنەوە، لارینەبوونیشیان پێدراوە لە ڕۆیشتن بەشێوازی خواستن، یاخود بە شێوازی هەمیشەیی.
سەرچاوەکە نووسیویەتی، مارکۆ ئاسینسیۆ لە لیستی فرۆشتندا نییە، بەڵکو تەنها لەیەک حاڵەتدا ئەگەر هەیە دەستبەرداربوونی پێبدەن، ئەویش ئەگەر یانەیەکی گەورە زیاتر لە 70 ملیۆن یورۆ بەرامبەر گواستنەوەی پێشکەشبکات.
