بەبۆنەی چوارەمین ساڵیادی كۆچی دوایی مام جەلال، كۆنسه‌ی به‌ڕێوه‌به‌ریی كەجەكە لە پەیامێكدا دەڵێت، مام جه‌لال شوێنپه‌نجه‌ی له‌سه‌ر ده‌ستكه‌وته‌كانی هه‌ر چوار به‌شی كوردستان دیاره، میراتی پەیوەندیی مام جەلال و ئۆجەلانیش بە كلیلی بەرەنگاربوونەوەی هێرشەكان وەسفدەكات.
كۆنسه‌ی به‌ڕێوه‌به‌ریی كۆما جڤاكێن كوردستان (KCK) لە پەیامەكەیدا دەڵێت، “له چواره‌مین ساڵیادی كۆچی دوایی سه‌رۆك مام جه‌لال تاڵه‌بانی، ڕێبه‌ر و دامه‌زرێنه‌ری یه‌كێتیی نیشتمانیی كوردستان و سه‌رۆك كۆماری عێراق، سه‌ری ڕێز و نه‌وازش بۆ بیره‌وه‌ری به‌ڕێزیان داده‌نه‌وێنین و پابه‌ندبوونی خۆمان به ڕێبازی ئازادیخوازی و نیشتمانپه‌ره‌وه‌رییان دووپاتده‌كه‌ینه‌وه”.
وتیشی، “له مێژووی هه‌ر نه‌ته‌وه‌یه‌كدا كه‌سانێك ده‌رده‌كه‌ون كه به زانابوونی مێژوویی، لێهاتوویی سیاسی و هه‌ڵوێستی شۆڕشگێڕی، مۆركی خۆیان له ڕووداو و پێشهاته‌كان ده‌ده‌ن و ده‌بنه به‌شێك له ناسنامه و مێژووی ئه‌و نه‌ته‌وه‌یه، سه‌رۆك مام جه‌لال تاڵه‌بانیش ئه‌و كه‌سایه‌تییه‌یه كه به زیاتر له نیو سه‌ده خه‌بات و تێكۆشان له‌پێناو ماف و ئازادییه‌كانی گه‌لی كورددا شوێنپه‌نجه‌ی له‌سه‌ر ده‌ستكه‌وته‌كانی هه‌ر چوار به‌شی كوردستان و به تایبه‌تیش باشووری كوردستان دیاره، هه‌ر له‌م پێگه‌یه‌وه توانی له‌سه‌ر ئاستی ڕۆژهه‌ڵاتی ناوین و عێراقیش ببێته ناونیشانی پێكه‌وه‌ژیان، ئاشتی، دانوستان و چاره‌سه‌ری كێشه‌كان”.
كەجەكە ئاماژە بە دۆستایه‌تی و هاوڕێیه‌تیی نێوان مام جه‌لال، ئاپۆ و ئیبراهیم ئه‌حمه‌د دەكات و دەڵێت، “بوو به هه‌وێنی یه‌كێتیی نه‌ته‌وه‌یی گه‌لی كورد له‌هه‌ر چوار به‌شی كوردستان و ده‌ستكه‌وتی مه‌زنی نیشتمانی و دیموكراتی لێكه‌وته‌وه، كه تائێستاش هه‌ر به‌رده‌وامن”.
دووپاتیشیدەكاتەوە، له ڕۆژگاری ئه‌مڕۆماندا كه دوژمنانی گه‌لی كورد هه‌وڵی له‌ناوبردنی ده‌ستكه‌وته‌كانی گه‌لی كورد ده‌ده‌ن، پابه‌ندبوون به میراتی شۆڕشگێڕی، نه‌ته‌وه‌یی و نیشتمانپه‌ره‌وه‌ریی ئه‌م دۆستایه‌تییه، كلیلی تێپه‌ڕبوونه له قه‌یرانه‌كان و به‌ره‌نگاربوونه‌وه‌ی هێرشه‌كان.
