بافڵ تاڵەبانی لەبارەی سەردانەكەی بۆ كەركوك ڕاگەیەندراوێكی بڵاوكردەوە، کەرکوکییەکان بە خاوەنی ڕاستەقینەی یەکێتی و شارەكەش بە قەڵای سەوزی پێکەوەژیان و برایەتی وەسفدەكات.
هاوسەرۆکی یەکێتیی نیشتمانیی کوردستان هۆشداریش دەدات لەوەی، ئەو غەدرانەی لە کەرکوکییەکان دەکرێن و بەردەوامیی هەیە، خەریکە دەگاتە ئاستێک کە قابیلی قبوڵ نابێت، دووپاتیشیدەكاتەوە، “باوەڕمان بە شەراکەت و پێکەوەژیانە، بەڵام لە مافی نەتەوەیی خۆشمان خۆشنابین”.
دەقی ڕاگەیەندراوەكەی بافڵ تاڵەبانی لەبارەی كەركوك :
کەرکوک بۆ ئێمە قودسی کوردستانە، قەڵای سەوزی پێکەوەژیان و برایەتی ھەموو نەتەوە و پێکھاتە رەسەنەکانی شارەکەیە.
کەرکوک ئەمانەتی مام، خوێنی شەھیدان و کوڕانی شۆڕشی نوێیە کە خوێنیان بۆ بەخشی و بۆ ساتێکیش کەرکوکییەکانیان جێنەھێشت، بۆیە کەرکوکییەکان خاوەنی راستەقینەی یەکێتین.
یەکێتیش وەک حیزبێکی دەربەست و پەیوەست بەرێبازی مام و خوێنی شەھیدان ھەر لەگەڵ کەرکوکییەکان دەمێنێتەوە ئێستا و ئایندەش بەهەمان ڕوحیەتی کارکردنەوە درێژەپێدەری ئەو ڕێبازە پیرۆزە دەبین و دەستبەرداری نابین.
ئێمە باوەڕمان بە ئاشتی، برایەتی و پێکەوەژیانە بەڵام ئەو غەدرانەی کە لە کەرکوکییەکان ئەکرێت و بەردەوامی هەیە خەریکە ئەگاتە ئاستێک کە قابیلی قبوڵ نابێت.
دەستی برایەتی بۆ ھەموو نەتەوە و پێکھاتە و ئایینزاکان درێژدەکەین و باوەڕمان بە شەراکەت و پێکەوەژیانە، بەڵام لە مافی نەتەوەیی خۆشمان خۆشنابین.
دڵنیاتان دەکەینەوە کە رێچکەی مام بەرنادەین، کەرکوک و کەرکوکییەکان شادەماری خوێنی نوێبوونەوەی یەکێتین و پێکەوە بەرەو ئاسۆیەکی روونتر ھەنگاودەنێین.
بافڵ تاڵەبانی
هاوسەرۆکی یەکێتیی نیشتمانیی کوردستان
