وەزارەتی خوێندنی باڵا و توێژینەوەی زانستیی هەرێم، وشه‌ی تێپه‌ڕ و نهێنی بۆ سەرجەم دەرچووانی قۆناغی 12-ی ئامادە کرد و ئاراستەی وەزارەتی پەروەردە و بەڕێوەبەرایەتیی گشتیی ئەزموونەکان کرا.
وەزارەتی خوێندنی باڵا و توێژینەوەی زانستی لە ڕاگەیەندراوێکدا ئاماژەی بەوەكردووە، “دوای هەوڵەکانی وەزارەت و ناوەندی وەرگرتن، وشه‌ی تێپه‌ڕ و نهێنی (پاسوۆرد و یوزه‌رنه‌یم) بۆ سەرجەم دەرچووانی دوازدەی ئامادەیی ئامادەکرا و دوێنێ ڕه‌وانه‌ی وەزارەتی پەروەردە و بەڕێوەبەرایەتیی گشتیی ئەزموونەکان كرا”.
وەزارەتەكە ئاشكرایكردووە، “دەرچووانی پۆلی دوازدەی ئامادەیی لەم هەفتەیەوە دەتوانن خۆیان سەردانی خوێندنگەکانیان بکەن بۆ وه‌رگرتنه‌وه‌ی وشه‌ی تێپه‌ڕو نهێنی (پاسوۆرد و یوزه‌رنه‌یم)، پێویستیشە دەرچووان بەباشیی پاسوۆرد و یوزەرنەیمەکانیان بپارێزن، چونکە دواتر لەڕێگەی ئه‌و (پاسوۆرد و یوزەرنەیم)ەوه دەتوانن (زانکۆلاین) پڕبکەنەوە”.
لەبارەی کاراکردنی زانکۆلاین بۆ دەرچووانی دوازدەی ئامادەیی، لە ڕاگەیەندراوەكەی وەزارەتی خوێندنی باڵاهاتووە،” لە چەند ڕۆژی داهاتوو زانکۆلاین بۆ دەرچووانی دوازدەی ئامادەیی کارادەکرێت و پێش کاراکردنیشی لە ڕاگەیەنراوێکی ڕۆژنامەوانیدا وردەکارییەکەی بۆ دەرچووان دەخرێتەڕوو”.
