وتەبێژی هاوپەیمانیی نێودەوڵەتی بۆ شەڕی دژی داعش ڕایدەگەیەنێت، هیچ یەكێك لە بەشداربووانی کۆنگرەکەی هەولێر پەیوەندی بە ئەوانەوە نییە.
وەین مارۆتۆ، وتەبێژی هاوپەیمانیی نێودەوڵەتی بۆ شەڕی دژی داعش لە عێراق و سوریا لە هەژماری تایبەتیی خۆی لە تۆڕی كۆمەڵایەتیی تویتەر لەبارەی کۆبوونەوەكەی هەولێر كە ڕۆژی هەینی بەڕێوەچوو، ڕایگەیاندووە، “دوور و نزیک هیچ پەیوەندییەکمان بەو کۆنگرەیەوە نییە کە لە هەولێر بەڕێوەچوو و هیچ زانیارییەکی پێشوەختەشمان نەبوو لەبارەیەوە”.
باسی لەوەشكردووە، “وەکو هاوپەیمانیی نێودەوڵەتی هیچ جۆرە پشتیوانییەک و هاوسۆزییەکمان بۆ بەشداربووانی کۆنگرەکە نییە”.
ڕۆژی هەینی لە هەولێری پایتەختی هەرێمی كوردستان كۆنگرەیەك بەناوی “السلام و الاسترداد” بەڕێوەچووە، ژمارەیەكی زۆر سەرۆك عەشیرەتی عەرەبی سوننی و شیعی تیایدا بەشداربوون، داوایانكردووە پەیوەندییەكانی عێراق و ئیسرائیل ئاسایی بكرێنەوە.
بەڵام كۆنگرەكە و داواكارییەكە كاردانەوەی لە هەرێمی كوردستان و عێراق لێكەوتەوە و ڕەتكرایەوە.
لەو چێوەیەشدا مستەفا كازمی سەرۆك وەزیران، سەرۆكایەتیی كۆمار، چەند حزب و لایەنێكی دیكەی عێراقی كاردانەوەی نەرێنییان هەبوو.
وەزارەتی ناوخۆی حكومەتی هەرێمی كوردستانیش لە ڕاگەیەندراوێکدا دووپاتیكردەوە، “کۆبونەوەکە بەبێ ئاگاداری و بەشداریی حکومەتی هەرێمی کوردستان ڕێکخراوە و بەڕێوەچووە، ئەم کۆبوونەوەیە بەهیچ شێوەیەک گوزارشت لە هەڵوێستی حکومەتی هەرێمی کوردستان ناکات”.
وەزارەتی ناوخۆ دەشڵێت، ئەوانەی بەشداربوون لە كۆنگرەكەدا لە هەرێمی كوردستان دەردەكرێن.
