وەرگرتنی ئابونەی حیزبی لەناو هێزەکانی پێشمەرگە قەدەغەکرا

كۆبوونەوەی ئەمڕۆی بافڵ تاڵەبانی و فەرماندەكانی پێشمەرگە

لە كۆبوونەوەیەكی نێوان هاوسەرۆكی یەكێتی و ئامرلیواكانی هێزی پێشمەرگە ڕێکخستنەوەی یەکەکان و بەرەوپێشچوونی توانا سەربازییەکان تاوتوێكرا، بڕیاریشدرا وەرگرتنی ئابونەی حیزبی لەناو پێشمەرگە قەدەغەبكرێت.

بافڵ تاڵەبانی، هاوسەرۆکی یەکێتیی نیشتمانیی کوردستان لە كۆبوونەوەیەكدا لە قەڵاچوالان لەگەڵ ئامرلیواکانی ھێزی پێشمەرگە باسی لە گرنگی و ڕۆڵی فەرماندەکانی پێشمەرگە کرد و وتی، “ئێوە پارێزەر و خاوەنی یەکێتین و ئێمە مێژووی پڕ لە خەبات و شانازی ئێوە لە یادناکەین. لە هەوڵەکانمان بەردەوامین بۆ پێداچوونەوە و ڕێکخستنەوەی یەکەکان و بەرەوپێشچوونی توانا سەربازییەکان. خزمەتکردنی هێزەکانی پێشمەرگە و دابینکردنی ژیانێکی شایستە بە ئەرکی خۆمان دەزانین و لەداهاتووشدا گۆڕانکارییەکان دەبینن”.

لەو چوارچێوەیەشدا وەرگرتنی ئابونەی حیزبی لەناو هێزەکانی پێشمەرگە قەدەغەکرا، بافڵ تاڵەبانی وتی، “دەبێت هەمووان خزمەتی پێشمەرگە قارەمانەکانمان بکەین و لە ئاست رۆڵ و قوربانیدانیان بین” وەك ئەوەی لە ڕاگەیەنراوی كۆبوونەوەكەدا هاتووە.

هەروەك باسیشی لە هەوڵەکانی ڕێکخستنەوەی هێزی پێشمەرگەی کوردستان کرد و ڕایگەیاند، یەکێتی پەرۆشی دروستکردنی هێزێکی نیشتمانییە کە بەرگری لە خاکی کوردستان و بەرژەوەندییە باڵاکانی بکات. بەپشتیوانی هاوپەیمانان و دۆستەکانمان ئەم پرۆسە نیشتمانییە جێبەجێ دەکەین و هێزی پێشمەرگە دەکەینە هێزێکی پڕچەک و پۆڵایین بەشێوەیەک لە ئاست تەحەددییەکان بێت و پارێزەری سەقامگیری و ئاسایشی هەرێمی کوردستان بێت.

ھەر لەکۆبوونەوەکەدا ھاوسەرۆکی یەكێتی سەبارەت بەچاکسازییەکان و ڕووبەڕووبوونەوەی یاساشکێنان ڕایگەیاند، دەبێت ھێزی پێشمەرگە وەک ھەمیشە سەرمەشقی گۆڕانکاری بن و پارێزەری جێبەجێکردنی بڕیارەکانی دادگا بن و وتی، “لەمەودوا ڕێگەنادرێت هیچ کەسێک بەناوی پیرۆزی پێشمەرگەوە دەستدرێژی بکاتەسەر موڵکی گشتی و یاساشکێنی بکات. ھەرکەسێکیش لە هەر پلە و بەرپرسیارێتییەکدا بێت بەتوندترین شێوە ڕووبەڕووی دەبینەوە و ڕاپێچی بەردەم دادگای دەکەین. کەدڵنیام ھێزی پیرۆزی پێشمەرگە وەک ھەمیشە پشتیوانی سەرخستنی ئەم پرۆسە نیشتمانییە دەبێت”.

كۆبوونەوەكە بە ئامادەبوونی شێخ جەعفەر شێخ مستەفا، جێگری سەرۆکی ھەرێمی کوردستان و مستەفا چاوڕەش، فەرماندەی ھێزەکانی حەفتا و مەحمود سەنگاوی، سەرپەرشتیاری ھێزەکانی حەفتا و عەبدوڵا کانی بەردی، لێپرسراوی مەڵبەندی ڕێکخستنی پێشمەرگە و ھیوا عەبدوڵا، لێپرسراوی میحوەری چواری کەرکوکی ھێزی پێشمەرگە بەڕێوەچوو.

بابەتی پێشتر

ئەفغانستان.. بەهۆی تەقە و چوار تەقینەوەوە 8 كەس بوون بە قوربانی

بابەتی دواتر

فڕۆكەیەكی ڕوسی ونبوو

بابەتی پەیوەندیدار
زیاتر ببینە

پەرلەمانتاران ڕەخنە لە دواخستنەكانی دادگاییكردنی زیندانیكراوانی بادینان دەگرن

ژمارەیەك پەرلەمانتاری كوردستان ڕایدەگەیەنن، دواخستنی دانیشتنی دادگاییكردنی زیندانیكراوانی بادینان پێچەوانەی مافە بنەڕەتییەکانی دەستگیرکراوانە و زنجیرەیەکی تری ستەمە بەرامبەریان،…
Total
1
Share