ترەمپ كچێكی برازای و ڕۆژنامەیەك دەداتە دادگا

دەڵێت، “تۆمەتیان بۆهەڵبەستووم”

دۆناڵد ترەمپ سەرۆكی پێشووی ئەمریكا، بڕیاریدا برازاكەی و ڕۆژنامەی نیویۆرك تایمز بداتە دادگا و دەڵێت، “تۆمەتیان بۆهەڵبەستووم”.

ساڵی 2018، ڕۆژنامەی نیویۆرك تایمز ئاشكرایكردبوو، “ترەمپ لە ساڵانی نەوەدەكانی سەدەی ڕابردوودا خۆی لە باجدان دزیوەتەوە”.

دوو ساڵ دواتر و لە پەرتوكێكدا بەناونیشانی “چۆن خێزانەكەم ترسناكترین پیاوی جیهانی خستەوە؟”، ماری ترەمپ برازای دۆناڵد ترەمپ سەرۆكی ئەوكاتی ئەمریكا وتی، “من زانیارییەكانم ئاشكراكردووە و بە ڕۆژنامەكەم ڕاگەیاندووە كە ترەمپ باجی نەداوە”.

ئەمڕۆ ڕۆژنامەكانی ئەمریكا بڵاویانكردەوە، ترەمپ بڕیاریداوە هەریەك لە ماری ترەمپی تەمەن 56 ساڵی برازای و چەند ڕۆژنامەنووسێكی نیویۆرك تایمز بداتە دادگا.

دۆناڵد ترەمپ ڕایگەیاندووە، برازاكەی ناپاكی لەگەڵ كردووە و ئەو ڕێككەوتنەی پێشێلكردووە كە هەردووكیان كردبوویان بەوەی ماری زانیارییەكان لەبارەی مامییەوە نەدركێنێت.

داوا یاساییەكەی ترەمپ دەڵێت، “ژمارەیەك ڕۆژنامەنووسی نیویۆرك تایمز، چەندین جار پەیوەندییان بە ماری-یەوە كردووە و قایلیانكردووە تۆمارە نهێنییەكانی باجدانی مامی دزەپێبكات و بیدات بە ڕۆژنامەكە”.

بەگوێرەی سەرچاوەكان، دۆناڵد ترەمپ بەهۆی ئەو ڕاپۆرتەی ڕۆژنامەكەوە زیانێكی زۆری بەركەوتووە و ئێستا داوادەكات بە بڕی 100 ملیۆن دۆلار قەرەبووبكرێتەوە.

بابەتی پێشتر

كازمی بۆ هاوڵاتییان: بە بەڵێنی درۆیینەی دامەزراندن دەنگەكانتان مەفرۆشن

بابەتی دواتر

چاکت داوەتە لانی بێعاری ھەم لە ناڵ دەدەیت ھەم لە بزماری

بابەتی پەیوەندیدار