حكومەتی عێراق ڕایگەیاند، بەمنزیكانە یەكەم مانگی دەستكردی عێراقی ڕەوانەی بۆشایی ئاسمان دەكات كە پەخشی 150 كەناڵی تەلەڤیزیۆنی و چەندین ئێستگەی ڕادیۆ دەستەبەردەكات.
ئەركان شیبانی، وەزیری گواستنەوە و گەیاندنی عێراق ئەمڕۆ چوارشەممە لە دووەم كۆنگرەی ئاسایشی سیبرانیی عێراق ڕایگەیاند، “بەمنزیكانە عێراق یەكەم مانگی دەستكردی خۆی دەنێرێت بۆ بۆشایی ئاسمان”.
ڕەعەد مەشهەدانی، وتەبێژی وەزارەتی گواستنەوە و گەیاندنی عێراق ڕوونكردنەوەی لەو بارەیەوە خستەڕوو و ڕایگەیاند، دروستكردن و هەڵدانی مانگە دەستكردەكەی عێراق، بە هاوبەشی دەبێت لەگەڵ میسر و كۆمپانیای عەرەب سات و كۆمپانیای ئێرباسی فەرەنسی.
وتیشی، ئەو مانگە دەستكردە پەخشی 150 كەناڵی ئاسمانیی عێراقی و چەندین ئێستگەی ڕادیۆ دەستەبەردەكات و خزمەتگوزاریی تەكنەلۆجیی پێشكەوتوو بۆ وەزارەتی گواستنەوە و گەیاندن دابیندەكات.
