بزوتنەوەی تاڵیبان، داواكارە ڕێگەی پێبدرێت لەبەردەم سەركردەی وڵاتان لە نەتەوە یەكگرتووەكان قسەبكات.
حكومەتەكەی تاڵیبان لەڕێگەی وەزیری دەرەوەیەوە، نامەیەكی فەرمی بۆ لیژنەی نەتەوە یەكگرتووەكان ناردووە و تیایدا داوایكردووە لەم هەفتەیەدا دەرفەتی پێبدرێت لەبەردەم سەركردەی وڵاتانی بەشداربوو لە كارەكانی كۆمەڵەی گشتیی نەتەوە یەكگرتووەكاندا وتار بخوێنێتەوە.
هاوكات بزوتنەوەكە سوهێل شاهینی وتەبێژی كاندیدكردووە وەك باڵیۆزی ئەفغانستان لە نەتەوە یەكگرتووەكان و ڕایگەیاند، باڵیۆزەكەی حكومەتی پێشووی ئەفغانستان لە نەتەوە یەكگرتووەكان نوێنەرایەتیی وڵاتەكە ناكات.
ئاژانسەكان لەزاری وتەبێژێك بەناوی نەتەوە یەكگرتووەكانەوە بڵاویانكردەوە، لیژنەی ڕێكخستن لە نەتەوە یەكگگرتوەكان داواكەی تاڵیبان تاوتوێدەكات و لە كۆبوونەوەیەكی باڵای ئەندامانی لیژنەكەدا كە ئەمریكا و چین و ڕوسیا و شەش وڵاتی تر لەخۆدەگرێت، گفتوگۆی لەبارەوە دەكات.
