فەرماندەی گشتیی هێزەكانی سوریای دیموكرات رایگەیاند، لەگەڵ دیمەشق لەسەر چارەسەركردنی كێشەكان رێككەوتوون و شەڕ بۆ یەكلاكردنەوەیان رەتدەكەنەوە.
ژەنەڕاڵ مەزڵوم عەبدی، فەرماندەی گشتیی هێزەكانی سوریای دیموكرات لە میانەی كۆبوونەوەیەكدا بە بەشداری فەرماندەی هێزەكانی هاوپەیمانیی نێودەوڵەتی رایگەیاند، دۆخی ئێستای سوریا ئاڵۆزە و ئەم قەیرانەی ئێستا بەرۆكی سوریای گرتووە، تەنها بە دیالۆگی ناوخۆیی چارەسەردەبێت.
ئاماژەی بەوەشكردووە، بۆ چارەسەركردنی كێشە هەڵپەسێردراوەكان و لێكتێنەگەیشتنەكان، لەگەڵ دیمەشق رێككەوتوون كە شەڕ بە هەموو شێوەیەك رەتدەكەنەوە.
روونیشیكردەوە، ئامادەن تەواوی دامودەزگاكانی بەڕێوەبەرایەتی خۆسەر لەگەڵ پەیكەری دەوڵەتی نوێی سوریا تێكەڵبكەن، بەمەرجێك لەسەر بنەمای رێككەوتنی لە پێشینە و دوای دەستپێكردنی گفتوگۆكان لەگەڵ دیمەشقدا.
جەختی لەوەشكردەوە، هیچ ئەندامێكی پاشماوەی رژێمی پێشووی سوریا لە ناوچەكانی باكور و رۆژهەڵاتی سوریا بوونیان نییە.
