خۆپیشاندان و كاردانەوەكان دژی هەرەسهێنانی باڵەخانەكەی شاری ئابادانی ئێران بەردەوامن و پۆلیس ڕووبەڕوویان دەبێتەوە و هەوڵدەدات كۆتایی بە خۆپیشاندانەكە بهێنێت.
ڕۆژی دووشەممەی ڕابردوو باڵەخانەی “میترۆپۆل” لە شاری ئابادان هەرەسیهێنا و 28 كەس مردن و 37 كەسیش برینداربوون. ڕووداوەكە دانیشتووانی ناوچەكەی تووڕەكرد و لە ڕۆژی چوارشەممەوە خۆپیشاندان دەكەن و داوای سزادانی ئەوانە دەكرێت كە بەرپرسبوون لە داڕووخانی باڵەخانەكە.
بەپێی سەرچاوەكانی ناوخۆی ئێران، خۆپیشاندان لە چەند شارێكی تری ئێران لەوانە ئەسفەهان سەریهەڵداوە وەك هاوسۆزی و پشتیوانییەك بۆ قوربانییەكانی ئابادان و كەسوكاریان. پۆلیس گازی فرمێسكڕێژی بەكارهێناوە و تەقەی بە ئاسماندا كردووە بۆ بڵاوەپێكردنی خۆپیشاندەران و هەوڵی كۆنترۆڵكردنی بارگرژییەكە دەدات.
وەك هەوڵێك بۆ قایلكردنی خۆپیشاندەران، دەسەڵاتی دادوەریی ئێران، دەستگیركردنی 13 كەسی ڕاگەیاند كە یەكێكیان سەرۆكی شارەوانیی ئابادان و دووانی تریشیان پێشتر سەرۆكی شارەوانیی شارەكە بوون.
