لەبارەی گرژییەكانی شەوی ڕابردووی گوندی تووە سپی، پۆلیسی دارستانی سلێمانی ڕوونكردنەوەی دا و برینداربوونی بەڕێوەبەرەكەی و چەند كارمەندێكی ڕاگەیاند، دەڵێت، لەلایەن سەرپێچیكارانەوە تەقەكراوە.
لە ڕاگەیەندراوێكدا بەڕێوەبەرایەتیی پۆلیسی دارستانی سلێمانی ئاشكرایكرووە، “دوای ئەوەی بڕیاری دادوەر وەرگیرا بۆ ڕێگریکردن لە دیاردەی زیادەڕۆیی و دروستکردنی خانوو بەشێوەی سەرپێچی و دوور لە یاسا ، مەفرەزەکانی پۆلیسی دارستان و چەند ئەفسەرێک چوونە سنووری گوندی تووە سپی”.
ئاماژە بەوەشكراوە، “لەکاتی ڕێگریکردن لە دروستکردنی چەند کۆگا و خانوویەکی تازەدروستکراو، گرژی و ئاڵۆزی لەنێوان سەپێچیکاران و مەفرەزەکانی پۆلیس ڕوویدا”.
پۆلیسی دارستانی سلێمانی ڕاشیگەیاندووە، “لەناو قەرەباڵغییەکەدا تەقە لە هێزەکانی پۆلیس کرا و بە دار و بەرد ڕووبەڕووی مەفرەزەکان بوونەوە، لە ئەنجامیشدا عەمید – ئاری ڕەئوف بەڕێوەبەری پۆلیسی دارستان و ژینگەی پارێزگای سلێمانی و شەش کارمەند برینداربوون”.
هەر بەپێی ڕاگەیەندراوەكە، پەڕاوی لێکۆڵینەوە ڕێکخراوە بۆ بەدواداچوون و وەرگرتنی ڕێکاری یاسایی.
