عەلی حەمەساڵح چارەسەرێك بۆ گرانبوونی نرخی بەنزین و نەوت دەخاتەڕوو

سەرۆكی لیژنەی وزە و سەرچاوە سروشتییەكانی پەرلەمانی كوردستان بۆ چارەسەری گرانبوونی بەنزین پێشنیاز دەكات كە حکومەتی هەرێم ڕۆژانە 100 ھەزار بەرمیل لەو نەوتەی هەناردەی دەرەوەی دەکات، بیداتە پاڵاوگەکانی ناوخۆ تا لەماوەی مانگێك ئەو كێشەیە چارسەر بێت.

عەلی حەمەساڵح، سەرۆكی لیژنەی وزە و سەرچاوە سروشتییەكانی پەرلەمانی كوردستان لە هەژماری خۆی لە تۆڕی كۆمەڵایەتیی فەیسبووك نووسویەتی، “هۆکاری گرانبونی بەنزین ئەوەیە بەشی ھەرە زۆری سوتەمەنی لەدەرەوە دێت، پاڵاوگەكانیش نەوتی خاو بە نرخی جیھانی دەکڕن، بۆیە قازانجی بازرگان و گومرگ و تێچووی گواستنەوە وادەكات بچێتە سەر نرخی سوتەمەنی و گرانبێت”.

دەشڵێـت، “ھیچ حوکمڕانییەک نیە لە دونیادا پاڵاوگە و نەوتی خاوی ھەبێت، بەڵام نەوت نە پاڵێوێت و ساڵانە زیاتر لە دوو ملیار دۆلاری بۆ کڕینی سوتەمەنی بچێتە دەرەوە”.

بۆیە، سەرۆكی ئەو لیژنەیەی پەرلەمان پێشنیاز دەكات، بە گەڕانەوەی چەند خەرجیەك نرخی بەرھەمە نەوتیەکان دادەبەزێت ئەوانیش “گەڕانەوەی قازانجی بازرگان و تێچوی گواستنەوە و گومرگ و ڕسوماتی کۆمپانیاكان”.

هەروەها حکومەتی هەرێم ڕۆژانە 100 ھەزار بەرمیل لەو نەوتەی هەناردەی دەرەوەی دەکات، بیداتە پاڵاوگەکانی کەڵەک، کار، بازیان و لاناس تا لەماوەی مانگێك ئەو كێشەیە چارسەر بكرێت، كە بەوتەی عەلی حەمەساڵح ھیچ پشتیواییەکی دارایی ناوێت.

بابەتی پێشتر

دوای ڕاپۆرتێکی تۆڕی میدیایی ئێستا خێرخوازان بە هانای باوک و کچێکەوە دەچن

بابەتی دواتر

کەرکوک .. نەتەوە و پێکهاتەکان تانە لە ئەنجامی هەڵبژاردن دەدەن

بابەتی پەیوەندیدار
Total
1
Share