ڕوسیا دەڵێت ئەو لێدوانەی توركیا پشتگوێناخات كە ڕایگەیاندبوو دان بە هەڵبژاردنە پەرلەمانییەكەی ڕوسیا لە ناوچەی قرمدا نانێت.
ڕۆژانی 17 – 19ی ئەم مانگە هەڵبژاردنی ئەنجومەنی دۆما (پەرلەمان) لە ڕوسیا ئەنجامدرا و ناوچەی نیمچەدوورگەی قرمی ڕوسیای گرتەوە.
لە لێدوانێكدا لەو بارەیەوە، تانجو بیلگیچ وتەبێژی وەزارەتی دەرەوەی توركیا ڕایگەیاند، “هەڵبژاردنە پەرلەمانییەكەی ڕوسیا لە نیمچەدوورگەی قرم بەلای توركیاوە هیچ هێزێكی یاسایی نییە”.
ئەو لێدوانەی كاربەدەستەكەی توركیا، كاردانەوەی ڕوسیای لێكەوتەوە و مۆسكۆ هەڕەشەی ئەوە دەكات كە لێدوانەكە پشتگوێناخات.
ماریا زاخارۆڤا وتەبێژی وەزارەتی دەرەوەی ڕوسیا ڕایگەیاند، “توركیا باش دەزانێت قرم بەشێكی سەروەرانەی یەكێتیی ڕوسیایە، باشیش دەزانێت ناهێڵین ئەم جۆرە لێدوانانە بەبێ گرنگیپێدان تێبپەڕن”.
