بەشی پەیوەندییە نێودەوڵەتییەکانی حزبی دیموکراتی کوردستانی ئێران ڕایگەیاندووە، ئەو چەک و موشەکانەی لەلایەن سوپای پاسدارانەوە بۆ بۆردومانكردنی بارەگاكانیان بەکارهاتووە، دروستکراوی وڵاتانی ڕۆژئاوا و چین-ن.
بەشی پەیوەندییە نێودەوڵەتییەکانی (حدکا) داوای ڕوونکردنەوەی لەو وڵاتانە کردووە، کە ناویان بەسەر پارچە موشەک و فڕۆکە بێفڕۆکەوانەکانەوە هەیە.
حدکا دەڵێت، “ئەو پارچانەی لە هێرشەکانی ئەمدواییەی سوپای پاسداراندا دەستکەوتووە، ناوی وڵاتانی (پۆڵەندا، هەنگاریا، ئەمریکا و چین)ی پێوەیە”.
ماوەی زیاتر لە دوو هەفتەیە هەڕەشە و هێرشەکانی سوپای پاسداران بۆسەر حزبەکانی ڕۆژهەڵاتی کوردستان بەردەوامە و ئەمڕۆش جارێکی دیکە سوپای پاسداران هەڕەشەی لە حزبەکان کردووە.
پێشتر حدکا ئەو پارچە موشەک و فڕۆکە بێفڕۆکەوانانەی ئاشکراکردبوو کە لە هێرشەکانی ئەمدواییەی سوپای پاسداراندا دەستیکەوتبوو.
