سەرۆك وەزیرانی عێراق و وەزیری داد جەختدەكەنەوە، “دەبێت گشت ئەو پارانەی عێراق كە براونەتە دەرەوەی وڵات بگەڕێندرێنەوە”.
ئەمڕۆ چوارشەممە “كۆنگرەی نێودەوڵەتی بۆ گەڕاندنەوەی پارە دزراوەكان” لە بەغداد بەڕێوەدەچێت و لە وتەیەكدا مستەفا كازمی سەرۆك وەزیرانی عێراق ڕایگەیاند، گەندەڵی و تیرۆر دوو ڕووی دراوێكن و عێراق خزێندراوەتە گەندەڵییەوە.
وتیشی، “حكومەت مكوڕە لەسەر گەڕاندنەوەی سەرجەم ئەو پارانەی عێراق كە براونەتە دەرەوەی وڵات و ئامانجی سەرەكیمان بەگژداچوونەوەی گەندەڵییە، بۆ ئەو مەبەستەش لیژنەیەكمان پێكهێناوە”.
كازمی ئاشكرایكرد، “لیژنەی بەگژداچوونەوەی گەندەڵی، بەشێك لە پارە دزراوەكانی لە دەرەوە گەڕاندووەتەوە و ئەو دۆسیانەی گەندەڵی كە لیژنەكە لەماوەی یەك ساڵدا ئاشكرایكردوون، بەدرێژایی 17 ساڵی پێشتر ئاشكرانەكراون”.
لە هەمان كۆنگرەدا، سالار عەبدولستار وەزیری دادی عێراق ڕایگەیاند، حكومەت مكوڕە لەسەر گەڕاندنەوەی هەموو ئەو پارانەی عێراق كە براونەتە دەرەوەی وڵات.
وتیشی، “ئامانجی كۆنگرەی نێودەوڵەتی بۆ گەڕاندنەوەی پارە دزراوەكان، ڕووبەڕووبوونەوەی هەموو ئەو كەسانەیە كە پارەی گشتی دەدزن”.
